Sich froͤit d̾ luft dc waſſer

Sich froͤit d̾ luft dc waſſer·
mit fúre· dú erde vn̄ dú zit·
iung mā des biſt dv laſſer·
ſin ſtúre dir alles dc git·
lieb iſt wilder creature zwein vn̄ zweī gemeine·
dv biſt d̾ w̾den mīne liebes ane vn̄ eine·
mīne iſt vnſtete bi
ſwa ſich d̾ roſe erzeiget·
da reiget· d̾ doꝛn an dc zwi·

Dú zit mit froͤidē buͤze·
d̾ ǒwe· dc ſi trurig wc·
meie die heide gruͤſſe·
ī tǒwe ſtet blv̊mē vn̄ gras·
wiſ bla gel bꝛvn gruͤne rot d̾ ang̾ ſtet geblvͤmet·
da bi ſich div linde bꝛeit ir gruͤnē lǒbes ruͤmet·
doͤnet dú nahtegal·
troͤſchel lerche vn̄ kaland̾·
vn̄ and̾· gefúgel ſvͤſſen ſchal·

Ich wil die mīne ſtrafē·
ſi ſwachet· ir erē ein teil^{[WS 1]}·
ſwa ſi wol ſolde ſlafen·
da wachet· ſi vf ir vnheil·
ich tv̊n ir mit rede gewalt· dc iſt ir wid̾ winne·
ſi v̾t vſſerthalb d̾ mâſſe vn̄ iſt genāt vnmīne·
mīne iſt vnſtete vꝛi·
ſwa ſich dú roſe erzeiget·
da reiget· d̾ doꝛn an das zwi·

Schimpfwoꝛt ſchimpfliches lache·
dú mīne·
vúr gv̊t vō dir nimet·
niemāſ ī ſchimpfe ſwachē·
d̾ ſinne· die mīne gezimet·
mīne git zwei liebē einē mv̊t vn̄ eine trúwe·
wand es ielich varwe iſt gelfˢ ī ir blvͤndē núwe·
lieb wirt niht and̾s leit·
golt ſwinet an d̾ hende·
ſelh ende· d̾ mīne iſt bereit·

Anmerkungen (Wikisource)

1. Vorlage: tel.