Si ist so rehte minneklich

Si ist so rehte minneklich·
min frowe das si iemer selig mvͤze sin·
si tůt mich wol vroͤiden rich·
nv troste kúniginne mir dc herze min·
sit din guͤte twinget mich·
dv eine lieb vor allen wiben·
nv solt dv genedeklich verdenken dich·

Min herze ist fro vf den gedingen·
swer mit trúwen dient dem wirt gelonet wol·
des mv̊s ich wol von schulden singen·
sit man rehter stete gerne danken sol·
vnd wolde dú gv̊te mich gewern·
so wolde ich hohes mv̊tes sin
vnd wolde ǒch iemer dvr si aller wibe embern·

Si ist mins herzen kúniginne·
wc darvmbe vnd wer es alder werlte zorn·
verliesen mvͤze ich mine sinne·
minú iar dú sint ze dienste ir an geborn·
des wolde ich vil gar an angest sin·
ob si den willen min erkande
mir wurde gelonet von der lieben vrowen min·

Wer sol tanzen wer sol singen·
wer sol dur die schone frowen sin gemeit·
wer sol sich zefroͤiden twingen·
wer sol dur si liden not vnd arebeit·
des wil ich an angest sin·
ob si den dienest min erkande·
mir wurde gelonet von der lieben vrowen min·