Seligú sumer zit

Seligú sumer zit·
dú bist gar verdrungen
rife in den ǒwen lit·
da die vogel sungen·
sit dú froͤide ist gar da hin·
so wil ich gedenken dar der ich eigenliche bin·
Froͤlicher svnnen tag·
rose in suͤssen tǒwe
ich dich wol gelichen mag·

Schoͤne vnd hohen mv̊t·
hat min frowe vnd ere·
da bi so ist si gůt·
noh hat si uil mere·
wol bescheiden tugenden vol·
dar zů lit an ir der wunsch dc tůt minem herzen wol·
Froͤlicher svnnen tag·
rose in suͤssen tǒwe
ich dich wol gelichen mag·^{[WS 1]}

Dv solt min meie sin·
vnd min spilndú wunne·
vnd ich der diener din·
klar alsam dú svnne·
ist din liehtes ǒgen brehen·
da mvͤsse ich in kurzer zit mich noh froͤlich inne ersehen·
Froͤlicher svnnen tag·
rose in suͤssen tǒwe
ich dich wol gelichen mag·^{[WS 2]}

Es ist vngelúkes sin·
vnd an der schilt wahte·
bi dir min troͤsterin·
vil der kalten nahte·
liden wir vf dirre vart·
die der kúnig gen misen vert· we dc si ie so spetú wart·
Froͤlicher svnnen tag·
rose in suͤssen tǒwe
ich dich wol gelichen mag·^{[WS 3]}

Ich wolte gerne sin·
vúr das vngemvͤte·
bi dir min troͤsterin·
ia fúrhte ich dc wuͤte·
an vns rife vnd ǒch der sne·
můs ich dar zv̊ trinken bier lieb so froͤidest dc mich me·
Froͤlicher svnnen tag·
rose in suͤssen tǒwe
ich dich wol gelichen mag·^{[WS 4]}

Anmerkungen (Wikisource)

1. Vorlage: Froͤlich̾· ſvn·
2. Vorlage: Froͤlicher ſvnnē tag· ⁊c̾·
3. Vorlage: Froͤlich̾· ⁊c̾·
4. Vorlage: Froͤlich̾· ⁊c̾·