Es seyn viel wider christen / die jetzund von wegen Die wider Christen. der versammleten Baurschafft / das Evangelion zu schmehnn vrsach nemen / sagent / das seyn die frücht / des newen Evangelions? Nyemand gehorsam seyn / an allen orten sich emporheben und auff pömen / mit grossem gewalt zuh auff lauffen und sich rotten / Gaistlich vnnd weltliche oberkaiten zu reformieren / auszureytten / Ja vielleücht gar zu erschlagen? Allen diesen Gotlosen frevenlichen vetailern / Antwurten diese nachgeschribne Artickel / Am ersten das sye dise schmach / des wort gotes auff heben / Zum andern die vngehorsamigkait / Ja die Empörung aller Bauren Christenlich endschuldigen / Zum ersten ist das Evangelion nit ain vrsach der Empörungen oder auffrühren. Dye weyl es ain rede ist / von Christo dem verhaissne Messia / Welchs wort vnd leben / nichts dann / liebe / Fride / Geduldt vnn ainigkaiten lernet / Also dz alle die in disen Christun glauben / lieplich / Fridlich / Gedultig / vnd ainig werden / So dann der grund aller Artickel der Bawren (Wie dann klar gesehen wirt) Dz Evangelion zu hören / vnd dem gemeß zu leben / dahin gericht ist / Wie mügen dann die widerchristen das Evangelion ain vrsach der Embörung / vnd des vngehorsams nennen? Das aber ettlich widerchristen vnd feynd des Evangelii / Wider sölliche anmuttung vnn begerung sich lonen vnd aufbömen / ist das Evangelion nit vrsach / Sonder der teüfel der schedlichst feynd des Evangelii / der solches durch den vnglauben in den seynen erweckt / Hyemitte das / das wort Gotes (liebe / freyd vnd ainigkait lernent) vndergetruckt vnn wegkgenommen wurde.
: Dye Grundtlichen Vnd rechten haupt Artickel aller Baurschafft. Melchior Ramminger, Augsburg 1525, Seite 3. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Dye_Grundtlichen_Vnd_rechten_haupt_Artickel_aller_Baurschafft.pdf/3&oldid=- (Version vom 3.3.2025)
