van unser wegen unde weder untfangen hebbe unde ok jue betalt hebbe, lyck also hirna gescreven stat.
Item int erste so sande ik Reiner 36 stukke gras, de stonden 48 ℔ 4 sl. 7 ₰. Item noch gesant Reiner 5 stukke gras, de stoinden myt allen ungelde tot op de karren 7 ℔ 7 sl. unde 4 ₰.
Item so hebbe ik jue betalt by Hans Lunynge van myner wegen 12 ℔ gr., de summe in al, dat ick utghelecht hebbe, lyck also hirvor gescreven stat, 67 ℔ 11 sl. unde 11 ₰.
Item hirop hebbe ik veder untfangen dat my Reiner sande van unser selscap wegen ene bale vysstene, da quam vor blivendes, vracht unde makelerdye afgeslagen, 14 ℔ 11 sl. unde 10 ₰.
Item so hebbe ik noch untfangen van Arnt Schulten 100 Rinssche gulden, vor elken gulden 34 gr. unde 2 Eingelsche, summe darvan 14 ℔ 8 sl. unde 11 ₰. Desse hadde Reiner to Kollen utgedaen, dat me se my to Brugge wedergeven solde.
Item so hebbe ik noch untfangen dat Reiner to Kollen utgedaen hadde van Arnt Sculten 100 gulden, vor elken gulden 35 gr., summe in gelde 14 ℔ 11 sl. unde 8 ₰.
Item so hebbe ik untfangen, dat my Reiner sande ein vat, dar hebbe ik ut vorkoft 11 tymmer marten; elk tymmer gaf ik umme 4 ℔ 16 sl. 6 ₰, summe 53 ℔ 18 gr.
Item noch vorkoft darut ein 1000 unde eine bote rodes werx, dat 1000 gaf ik vor 5 ℔ myn 2 sl., summe 4 ℔ 18 sl. 10 ₰. Item noch darut vorkoft ein 1000 (unde) 21½ tymmer rodes werx, dat 1000 gaf ik umme 4 ℔ 9 sl., summe 8 ℔ 4 sl. 10 ₰. Item geven van dessen dinge to makelerdye 2 sl. 10 ₰. Item stont it van Kollen to vorne tot to Brugge 10 sl. gr. Item enen groten optoslane, de summe, dat van dessen vate gecomen is, blivendes 65 ℔ 12 sl. unde 3 ₰.
Item so hebbe ik noch untfangen ein tymmer marten, dat hevet Hans Lunynck, dat leget noch unvorkoft, also ik van dar toch unde wan ik by ju kome, so wel ik jue van allen dingen wol alle beter beschet seggen.
Item so wetet Hyllebrant, dat Reiner unde my duchte gut sin, dat gy uns koften ein 20 ofte ein 30 stukke gras, alsulke varwe also de 10 stukke weren nu to der Torolder market unde senden dey hir unde oft ik dar nycht einqueme, so nemet se van Jacop Darkes to sulken dagen also ik se plege van em to hebben, wente Reiner de ment se wol to vordriven kegen desse mysse, mer ik hope jo dar to sinde mene ik kegen Torolder market, mer einkome ik dar nycht, so doet wol unde vorsumet uns dar nycht ane.
Item so moste wy jo hir mer wullen hebben int erste 2 sekke unde darna in ener mant noch darto 2 sekke, wente sal he se holden, dey de wullen plege van Reiner to hebben, so einmach he sunder wullen vesen. Hirna rychtet jue, Hillebrant unde sendet se hir unde jo wat gudes.
Item so wy jue erst gescreven hebben van den scroplingen, so bydde wy jue noch, ist dat dar boet komen, dat gy dat met den ersten scriven Reiner, wente he is dar gut by int erste, wente he sal uns des wol vroet maken unde wysen uns dat, des wy nu nycht einweten unde wan he it uns gewyst
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 493. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_493.jpg&oldid=- (Version vom 31.7.2018)
