501. Werner Scherer und Reinhard Noiltgin in Köln an Hildebrand Veckinchusen in Brügge.
- Rev. St.-A. Orig. Adr.: An den erber wysen man Hillebrant Veckinxhusen to Brugge sal dese bref.
Vruntlike grote tovoren an mynen guden vrunt, Hillebrant Veckinxhusen. Weten sole gy, dat dat pack met den scroplingen wol hir is gecomen unde dat sal gude gadinge sin unde it is gut kop. Leve Hillebrant konde gy der noch ein 10 000 hebben, dat were gut unde uns verlanget na tydinge oft de Spansche scepe noch nycht overkomen ein sin, so solde Reiner by ju sin met den ersten. Mer wy hebben de konyne vorkoft, hedde he de levert, so solde he by jue komen unde it mochte gevallen, ik mede. Vort so hebbe ik Lunynge gescreven, dat he noch ju geven sal 10 ℔ gr. unde wyste ik, woevel dat ik noch sculdych were, he solde it jue al geven. Mer ik mene en kort by jue to sinde ok maket jue jo der vordel quit, se gelden hir 95 gulden unde it is suene, se solen komen oppe 90 gulden. Item Hillebrant her Tydeman Zwarte, de is nu hir unde vorhope eins guden ende, Got unde unse leve vrowe, de moete uns vorlenen ein gut ende.
Item Hillebrant ramet des besten met den scroplingen, wente dar is wol profyt an to doende ok met den grawen laken, profet ok dat beste, dyt moste al hir sin vor der myssen. Anders einwet ik jue wat scriven dan wy hopen beyde, oft Got wel, in kort by jue to sinde unde doet wol unde grotet my myne moder unde juwe dochter vruntlyken van myner wegen unde ok darboven Renolt Zwarten unde sinen broder unde seget em, dat ik em de tydinge unbede, dat me hir guden win druncket umme 4 marken unde den allerbesten umme 6 marken. Anders einwet ik jue wat scriven dan gebeydet over uns also over juwen guden vrunde unde profet dat beste. Gescreven oppe sunte Jacoppes avende in Kollen.
Item so wetet Hillebrant dat wy jue bydden dat gy uns al dat ungelt over wellen scriven wat de konnyne kosten to Brugge unde line unde kannefas, ok so einweselt gein gelt op Reiner, wente wy wellen selven by jue wesen, so einwere hir nymant, dey it betalde. Darumme so lat dat bestan. Anders nycht dan vart wol.
502. Werner Scherer und Reinhard Noiltgin (in Köln) an Hildebrand Veckinchusen in Brügge.
- Rev. St.-A. Orig. Adr.: An den erberen unde wysen man Hyllebrant Vockinxhusen to Brugge sal desse bref. In dorso von der Hand des Empfängers: Dyt es dey rekenschap van Wernner
Scherre.
Vruntlike grote tovoren an mynen leven vrunt Hillebrant Vockinxhusen; weten sole gy, dat dyt de rekenschap is, wes ik Reiner gesant hebbe
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 492. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_492.jpg&oldid=- (Version vom 31.7.2018)
