Seite:Briefwechsel Hildebrand Veckinchusen 491.jpg

Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

	Wilhelm Stieda (Hrsg.): Briefwechsel Hildebrand Veckinchusen

500. Heinrich opme Orde an Hildebrand Veckinchusen und Sivert Veckinchusen.

Rev. St.-A. Orig. Adr.: An Hildebrand Vekkenkhusen unde Sywert Vekkenkhusen lyttera detur.

Vrentlyke groute vorgescreven. Wete Hildebrand om, Tydeman let my breyve lesen, dey gy gescreven hadden unde Zywert unde bat my, dat ik ok myn guddunken ju screve. Ik scref lest Zywerde myn guddunken by deme boden. Item also gy nu scryven, gy volden al dat awergeven, dat gy hebben of gy darmede quyt mochten syn; volden se ju darmede quyt schelden, so mochten gy darmede quyt syn. Item my duchte best, dat gy screven an juwe vre^ende to Brugge, dat se ju lede verwen unde boden juwen schuldeners al dat gy vermochten, so dede gy vol. Volden se dan dat vorleggen, so mochten gy juwe beste wesen. Et is manych versten schuldych unde blyven schuldych unde hebben genoch to betalen; de van Borgonygen enne betalde met 1000 ℔ nycht, de dan der is^[1]. Item van se met ju nycht lyden enne vyllen unde gy en gerne geven volden, al dat gy hedden, so enne hebbe gy tegen Gode neyne grote schult. Item solde ik en ok al dat geven, dat ik hedde, unde en darmede nycht mede quyt konde verden, ik sege van ik eme dede: enne mochte ik to Kome oft to Lubeke oft to der Ryge nycht blyven in den hensesteden, ik note myner vre^ende unde toge to Kokkenhusen of in Kurlant by den bysschop. Et is tomale hart met vyf unde kynderen ume brot to gande; de 100 marc Ryges oft 200 tohope konde brengen, de bergede vyf unde kynder. Item gy scryven, juwe gut by jume ede van ju to gevene, dat enne vynt syk nycht. Hedde ju wyf of gy dan na der tyt wes, dar vol spreken op; geven gy ok al, dat gy hedden unde solden allyke vol manynge hebben unde verde lyden, so volde ik lever al, dat ik hedde by en brengen, so ik erst konde unde voldet dan werden to kennende geven, ves gy hedden unde vol my dan myne werde laten en ende maken met den schuldenern. Item to Kolne op der vryget moge gy lange genoch syn; doch jo gy er enen vech slan, jo et bet vor ju unde ju kynder is na den vordon also gy sryven; unde brengen de kynder by ju vre^ende, so don gy eme jo met deme vyve. Ik volde, dat gy juwen vre^enden alle dynk klar hedden to kenende geven, de gy hervoren, so mochten se ju dat beste geraden hebben; en seget deme anderen vele bet en dynk, dan he et eme scryven kan; de neynen kummer het gehat, de enne vet nycht vat kummer is. Ik enne wet ju op dese tyt anders nycht to scryvene. Blyvet gesunt lange to Gode densten. Gescreven des ersten dages na unser vrowendage der erste.

Hinryk opme Orde.

↑ Gemeint wird sein Johann IV., der als zweiter aus dem Hause Burgund Herzog von Brabant war. Sein Vorgänger war sein Vater Anton von Burgund, Herzog von Brabant 1406, gefallen 1415 Oktober 25.

Empfohlene Zitierweise:
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 491. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_491.jpg&oldid=- (Version vom 12.5.2018)

[1] Gemeint wird sein Johann IV., der als zweiter aus dem Hause Burgund Herzog von Brabant war. Sein Vorgänger war sein Vater Anton von Burgund, Herzog von Brabant 1406, gefallen 1415 Oktober 25.

[1]