3 stro sal hey 6 gulden to kope hebben, dyt gelt gevet eme dar ic hebbe eme hyr nicht geven. Dey 4 stuocke vorscreven und 3 stro horn to den 1 hundert; und hyr syn noch by 12 stucke Rusch was, dat wel ic by ju bynnen kord senden; vorkopet wan wy wynnen mogen; und ic hebbe Arnd Wachendorppe gund un mestet eme gunnen umme som sake wyllen, dat eme al was half gelt und syn wyn und vorlues mede geyt. Dat ic hyr koft hebbe, also steyt hey dat eventur half van den 1 hundert, men vorkopet elk bysunder dey 15 stucke bysunder und dey 1 hundert bysunder und maket uns dat gelt van den 15 stucken op dey vastmysse to Francvord und met den ander kopet guden kop laken und beydet over my. Ghescreven 14 dage na Kerstdage.
481. Bruchstück aus einem Briefe Sivert Veckinchusens.
- Rev. St.-A. Orig. Pap. Die Handschrift ist unverkennbar die des S. Veckinchusens.
Item also umme Peter van dem Dame. Syn wyf dede my 4 ℔ geven und seged, dat ic ir syden senden solde, dey wolt sey wol vorkopen. Also sande ic er syden und dey leyt sey 3 jar by sik lygen und dede sey doe Tydeken Swarte, dey helt sey ok lang und verkoft eyn del und sande darvor Peter to Lubeke, dey voren ok wunderlyken an quaden schulden. Und dey ander syde sande my der Tideman weder, der leget hyr noch 2 punt. Und sey hadden dey to Bruogge laten vorderven, also dat sey untverwet es und ic wolde dar gerne vele ane vorleysen, also dat ic met dem gelde nein ander profyt doen hebbe, und ic doe em met dan vel, dat ic em syn gelt weder geve. Dyt segget em aldus.
482. Bruchstück aus einem Briefe Sivert Veckinchusens.
- Rev. St.-A. 2 Papierstreifen.
Item helppet Losekynge des besten und dat hey van dar kome und gevet eme 350 gulden van unser Venediesschen selscap wegen; dey 150 gulden moet ic hyr hebben. Segget Bylevelde, dat hey hyr weder to kome und ok Losekynge, wan sey er dync daen hebben.
Ok segget Kulen, dat dar 440 gulden reyde syn to des olden rades behoef dat eyrste, dat wy wyssynge vor dat gelt weten, so sal men eme dat gelt doen ofte wolde hey dat gelt hebben und loven uns dat gelt weder to geven ofte uns dey wyssynge nicht wurde vor sunte Mychele, dyt duncket my best syn umme vele sake wyllen op dat ic neynen undanc krygen dorfte und unse selscap ok in neynen schaden queme. Wand vornemen dey olde rat, dat wy dat gelt nicht utleynen wolden alse ic en to seget hebbe, so mochten sey uns op greten schaden und ungunst brengen met vele saken. Darumme mach men dat nicht vorleggen al wat dat kostet, alsolde ic ok dat eventur allene darum staen.
Anmerkungen (Wikisource)
- ↑ Vorlage: Indexziffer zur Fußnote fehlt
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 471. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_471.jpg&oldid=- (Version vom 31.7.2018)
