478. Bruchstück aus einem Briefe Sivert Vechinchusens an seinen Bruder Hildebrand.
- Rev. St.-A. Orig.
Item wetet leyve broder dat ic ju rekenscap van unser selscap wegen overseyn hebbe eyn del, my duncket, dat ic my dar nicht wol ut untrychten kan, darumme scryve ic ju dyt nascreven op dat gy my des vrot maken.
Int eyrste scryve gy, ic hebbe utgeven vor payment 46 ℔ 12 sl. 11 gr. und ic hebbe, men summa betalt 41 ℔ gr., dyt solde 5 ℔ 12 sl. 11 gr. schelen, war dyt an schelt, des wet ic nicht.
Item hebbe ic betalt Zergys Veckynchusen 7 ℔ gr., item hebbe ic betalt Johannes Hoesteyne 18 ℔ gr., summa 25 ℔ gr., desse 25 ℔ gr. hebbe ic van der selscap gelde betalt und staen nicht in der selscap rekenscap.
Item dey 83 marc 1 sl., dey ju Lyseke an gelde sande und dey 24 marc 11 sl. 4 ₰ van Hoesteyne, summa 107 marc 12 sl. 4 ₰ staen ok in der rekenscap nicht.
Item ic sande ju ok 1 perd, dat stand 25 marc Lub., dat ward ok van der selscap gelde betalt, dat staet ok in juwer rekenscap nicht.
Item so hebbe ic ok untfangen van Crowel 20 ℔ gr., item van Bertolt van der Vesten 10 ℔ gr., summa 30 ℔ gr.
Ic sande ju nu lest eyne rekenscap also my duncket dey ic ju ok erscreven hebbe, dey overseyt und slechtet dar ut unser selscap dync und scryvet my al boschet darvan, est dat dar icht an schelt, dat wel ic wol to rekenscap brengen. Latet dey 122 cronen in der rekenscap blyven.
Item ic en scryve dey rekenscap nicht vorder ut van unser selscap wegen, ic sende ju dey rekenscap weder op dat gy dat al slecht scryven mogen, wan gy dat also sand hebben, also dat staen sal, so scryvet my dey rekenscap so wel ic dat ok also scryven, gy sanden my lest dey wedergade van desser sulven rekenscap, dar scryve gy inne, dat gy 71 ℔ 21 gr. tachter blyven, dey scryft holde ic hyr al wat gy mer op desser rekenscap screven hebben, dat scryve ic nicht ut, er gy dat al vast maket hebben, ok doch dyt nicht afkorttet, er wy desser selscap und rekenscap vrot syn elk synen wech to eynen eynde und wan gy al gelt overkoft hebben und darna wel wy dan wol afkortten, woe gy dat leyvest hebben wellen, latet myn ersten rekenscap vast staende blyven, breket dar icht ane, dat wel ic der selscap an gelde overgeven, wat ic nicht bereken kan. My unbreket noch ungelt und ok quade schult, men der quaden schult es nicht vele und hope dey sole noch wol betalt werden, ic welder ok nicht reken, er ic wet oftet betalt werd.
Item gy scryven in der rekenscap gy hebben to Lubeke in dey selscap leget van Tydeken Swartten wegen 83 marc und 3½ sl. Lub., summa 13 ℔ 6 sl. 8 ₰; item noch hebbe gy in dey Venedyesche leget van Tyten selscap komen was 70 marc und 4 sl., an Vlameschem gelde 11 ℔ 7 sl. gr. Desse vorscreven 2 summa geldes dey betale ic ju doch propper, darumme komen dey nicht in dey rekenscap also ic meyne.
Item gy scryven van 5 Tomaschen laken, dey gy by Zergys Veckynchusen oversanden, dey gaf ic eme an 11 ℔ gr., dey gy untfangen hadden
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 468. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_468.jpg&oldid=- (Version vom 31.7.2018)
