Item Bertram so wete gy wol unde Herman Platenslagher so wes gy vorantworden to Lubeke Evert Moyelik unde Tydeman Brekelvelden op myne scryft van Collen, woy dey fygen weren den mestendel betalt op dey wyse, dar wyl ick nicht inbegrepen sin, anders sey solen dat wol seggen, so yt es Evert unde Tydeman; aldus so dunket my noch dat dar nicht ein pfennig betalt es, est dyt recht unde bescheyt, dat sol seck wol vinden. Wellet God, ick wyl met dessen saken dus nicht lyden wante van dessen saken sal scheyn her Johan met den Eye unde sin selschap gude betalinge van ju, also van myr wegen also van den gelde, dat dar mach inkomen sin van den fygen, dat sal men ok tom besten prysse herover maken mynes partes; ick wel dar geyn vorleys angedan hebben.
475. Hildebrand Veckinchusen zeichnet seine geschäftlichen Beziehungen zu dem verstorbenen Jakob Schotteler auf.
- Rev. St.-A. Ein auf beiden Seiten mit H. V. Hand beschriebenes Papier Orig.
Jacop Scotteler, daz God dey sele van hebben mote unde alle zeyle amen, dey untfenck van myr wegen van Johan Boppeler 34 ℔ 19 sl. 10 gr. Darop so was ick emen schuldych, so myn sedel vorclaret, van makelerdye. Des so hevet Jacop vorscreven dey mekelerdye noch eins untfangen van mynen parte van 1267 korf fygen 2 ℔ 12 sl. 9 gr. 12 myten, dey emen Berttram Rennenberch gaf, na dat hey kopman was. Dat gelt ment Berttram my aftokorten in myr rekenschap, aldus so sal men dyt afkorten in Jacopes Scotteler sedelken van der makelerdye.
Item so hevet Jacop Scotteler puntement gemaket myt Nyclauwes Blancken van Pauwels Spinghele, deme ick noch schuldych was van syde 19 ℔ 12 sl. 8 gr.; hirvan mot ick ene quytancyghe hebben.
Item so gaf Jacop vorscreven Wyllem den Souter op myn breyf dar ick tovorn op hadde doen betalen by Johan Osterman und Johan Walleken 20 ℔ gr. van myr wegen; darop gaf Jacop vorscreven nicht mer dan 9 ℔ 10 sl. Den breyf begere ick to hebben.
Juncvrouwe Scotelers so begere ick de zedelle van der makelerdye to hebben und den breyf van Wyllem den Soutter van 29 ℔ 10 sl. gr. unde ene quytancyghe van Nyclauwes Spinghelle heyten Blancke van Pauwels Spinghele wegen also vorscreven stet.
Darto begere ick to hebben myn reste so wes my boren mach van gelde dat Jacop to vele untfangen hevet.
Item so hebbe ick Jycop Scotteler vor 10 pypen olyes to rekent to mekelerdye 1 ℔ gr.; aldus so hevet hey dar to velle noch 10 sl. gr.
Her Johan Bartun
der Wyllem Gherolf
Rolant van der stenbruggen, mester van der tolle.
Jacop van Vorsener
Jorys van Jungy.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 465. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_465.jpg&oldid=- (Version vom 31.7.2018)
