dorvan solde sin, dat moste sin met rade mer vrende, do hoe segede ick were 1 loys kalant met mynen grynden worden unde wolde dat ick noch vor 125 ℔ in den sten lege. Op solken sin gynge dar ut met mer worden.
474. Hildebrand Veckinchusen fordert von Bertram Rennenberch Auskunft über den Stand verschiedener Geschäfte.
- Rev. St.-A. Papier mit H. V.’s Hand.
Bertram Rennenberch also gy wol weten dat wy her Johan met den Eye sin schuldych met sin selschap van den fygen blyvendes geldes 221 ℔ 7 sl. 11 gr., darvan es dey helfte to mynen parte, dat gy van myr wegen betalen solt 110 ℔ 13 sl. 11½ gr.
Bertram also gy spraken ein vrydage vor Jacop Scotteler unde Herman Derssouwe unde Gherwin van den Espen, woy gy alle ungelt van den fygen betalt hedden hir unde ostert, darop wetet Bertram, dat dey fygen stonden myt allen kosten wente to Hamborch 15 ℔ gr. darvan hebbe ick ju dey helfte betalt op 2 ℔ gr. na, dey ick Wyllem unde Lamsin Woyst noch geven sal.
Item Bertram so begere ick to weten van ju, wat dat stan dey 16 scheppunt 17 marcpunt wasses unde vort so wes dar hirvan mach werden blyvendes.
Item Bertram desgelykens begere ick weten also van den leynwaude, dar gy my van segeden to Lubeke wat dat kostede unde wes darvan mach worden sin ofte werden sal.
Item Bertram also ick ju vragede, dat gy my solt seggen woyvelle geldes dat dar inkomen were to Lubeke van den fygen, dey dar mochten vorkoft sin, dar gy my op antworden, gy en wysten des nicht. Herman Platenslagher hedde scryft unde gelt al in handen unde gy segeden, gy hedden dar dessen stoven somer[1] mede togebracht. Mer bescheydes wolde gy my nicht seggen, mer ick hope unde mene dar noch mer bescheydes van to hebben, est recht wante unse vorworde sin desse alto mer alst inqueme, so solde men dat to besten profyte her int lant maken, dar ick noch nicht van vorneme. Ick hope Herman unde gy solt wol alsolk sin, dat gy my don solt also ick ju wol don moste.
Item Bertram also ju wol vordenken mach, dat ick ju eine scryft van Collen sante, dey ju Evert Moyelyk antworde met gaders Tydeman Brekelvelden, unde was darinne begeren met mer worden, woy gy dey betalinge hir don solt, dat ick myns dels untslagen worde. Unde ok myn wert wante men wolde em to wete pouren unde ok was ick begerende bescheyt wes dat dar mochte in komen sin van gelde edder nicht, dat gy my dat solden scryven alle rekenschap unde beschet also seck dat geborde, so dat ick des beschedes nicht krygen konde. Dat beschet begere ick noch to hebben van ju unde Herman Platenslagher.
- ↑ Schwer leserlich.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 464. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_464.jpg&oldid=- (Version vom 31.7.2018)
