Seite:Briefwechsel Hildebrand Veckinchusen 446.jpg

	Wilhelm Stieda (Hrsg.): Briefwechsel Hildebrand Veckinchusen

Vrentlike grote tovoren unde wat wy gu^edes vermogen. Wetet, gu^eden vrende, dat wy ju senden in desser vlote 3 tunnen werkes, gemerket met dessen merke unde 1 stro wasses, dar ys inne 4 stu^ecke, in Johan Witten 2 tunnen unde dat stro wasses. De ene hevet en ₰ by den merke, dar is inne vor deme rechten bodeme 3½ tausend schonswerkes unde 1 tymmer unde wy meynen es sei mer under deme andren bodeme 3000 (unde) 1 qwartir annyghe unde 2 tymmer vymatken. Item de andre tunne hevet ein b. by den merke, dar is inne vor deme unrechten bodeme 2000 (unde) 1 qwartir troynysche by 10 gebonden, darnest 14 tymmer doynyssen imme ledere, darnest 7000 schevenyssen; vor deme rechten bodeme vort 3000 lu^osches werkes. Dyt is in Johan Witten gegeven de halve vracht en mark 9 ore, deme andren 28 ore Item 1 tunne in Hinrik Aldelande, dat stet en a. by den merke, dar is inne ½ 1000 lasten 14 wymeteken, 1 tymmer 24 hermelen unde 4 wymeteken, darnest 8½ tymmer poppelen noch 1000 (unde) ½ tymmer gu^eder troynyssen unde noch 3000 (unde) 8 tymmer troynissen unde 6000 schevenisse unde noch 3 tymmer 1 bote harwerkes unde 1 tymmer konynghe unde 5 bote lu^esches werkes. Item vor dem bodeme, dar de a. vorstet noch 1000 annyghe, dat dar ok tohort. Wat in dessen 3 tunnen is unde de 2 bodem wasses, dat hort altomale to den vygengu^ede. Anders nicht mer. Blyvet gesunt in Gode. Gescreven op su^ente Johannes dach in der olyboden to Reval.

By uns Goschalk Linstede unde Radelwins, Reynolt Swarte.

445. Gottschalk Lintschede in Reval an Hildebrand Veckinchusen und Heinrich von Staden.

Rev. St.-A Orig. Adr.: An Hildebrant Vockinchu^esen unde Hinrik van Staden detur littera. In dorso von H. Veckinchusen’s Hand: 5 stucke wasses in Arnde van Hasselte 25 in settember.

Vrentlike grote tovoren unde wat ik gu^edes vormach. Wetet, gu^eden vrende, dat ik twyge juwen breyf wol vornomen hebbe, dat gy hebben untfangen de 3 tunnen werkes unde dat stro wasses unde de Here sy gelovet.

Item also gy scryven van den gu^ede, dat wy hir hebben untfangen rekenschop begeren, dar welle wy na wesen, so wy aldererst konnen, dat wy dat maken mer gy moten leyden also langhe dat dat gu^et vorbu^etet sy, dat wy hir noch hebben imme lande 13 leste, sante wy nu tovorejaren to Nowerden wert, de uns to herveste qwemen unde 4 tunnen, de nu to vorejaren qwemen. De 4 tunnen sante uns Syvert Vockinchu^esen vamme Su^ende, de liggen hir noch in der haven geschepet unde 7 leste soltes leggen noch ter Narve unde to Nowerden unvorkoft. Aldu^es moghe gy wol merken, dat dar ghen ende ofte rekenschop af to maken en ys noch. Item also gy scryven van den sydengewande, dat hir is, of wy des hir nycht vorkopen en konden, so solde wy et ju^e senden, dat en doch even nicht gedan, wante et is al solk dink, dat in Vlandren nicht en doch jo (!) ghelt af to makene. Wy hebben es hir en del vorkoft; met den anderen welle wy des besten ramen, of God wel. Ik es kan ju hir andes nicht van gescryven op desse tyt. Mer blyvet gesunt.

Empfohlene Zitierweise:
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 446. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_446.jpg&oldid=- (Version vom 31.7.2018)