plusinge. Item wy hebben ju gesant in twen schepen de segelden hir ut des vridages vor sunte Bartolmeus dage, erst in Pilgerim van dem Wigere 1 tunne werxs wat darinnen is, dat vinde gy in den breven wol, de darby is.
Item, in Tideman vamme Loe 5 stro wasses, dar sin inne 6 boddem wasses unde 1 tunne, dar sin inne 15 000 schevensen; de halve vrucht is betalt.
Item, so sende wy nu ju to Lubeke to an Sivert Voccinchuzen ene tunne, dar is innen vor dem unrechten boddeme, is de toch 9000 troinissen. Desse troinissen sin tomale ungelike unde ir is wat gebunden by 15 unde ok wat by twintichen. Dat poppeln sin mer, ir is wat by 20 gebunden, de sin gerekent vor halve timmere, et is al alzo als et van den Russen entfangen is unde dessulven dages als et uns quam uterken, so persede wy et in en tunne umme vort to schepen. Dat schip lach rede; in der selven tunne vor dem rechten boddeme 2000 schevensen, darnegest 4 timmer marten. Dit is et dat in desser tunne is; kunen wy ju noch vor dem herveste wat mer gesenden, des en wete wy noch nicht, wy willen des besten ramen. Wy hebben Siverde gescreven, dat he desse tunne vort sende so vro als et em stet unde he mach unde wan et em gud dunket, dit is dat merke. 
Wy en kunen ju anders hir nicht van gescreven, unterwilen mer wy willen des besten dat wy kunen unde mogen na unser vruntschopp. Moget wol in Gode. Gescreven an sunte Bartholmeus avende to Revele.
442. Gottschalk Lintschede und Hans Radelwisch in Reval an Hildebrand Veckinchusen und Heinrich von Staden in Brügge.
- Rev. St.-A. Orig. Adr.: An Hildebrant Vokkinchuesen unde Hinrik van Staden to Bruge. In dorso von H. Veckinchusen’s Hand: 18 in settember 5 stucke wasses in Arnde van Hasselte.
Vrentlike grote tovoren unde wat ik gudes vormach. Wetet vrende, dat wy jue senden in Arnt van Hassele 5 bodem wasses, gemerket met den vygen merke, gewegen to Nowerden 2001 lispunt; se en worden hir nicht opgeschepet, wy en hebben deme schepren gene vracht geven, mer den kindren hebbe wy dat winnegelt geven. Item, wes wy hadden van to herveste, also de 13 leste unde 5 tunnen unde 14 tunnen, de uns qwamen ut Pruesen unde 4 tunnen qwamen uns vanme Suende. Dyt hebbe wy al to Nowerden gesant van dessen jare, dar is dyt was weder van gekomen unde nycht mer. Gy scryven vuste, dat wy jue solen rekenschop scryven, wo konne wy dat gedan, er dat guet vorkoft ys? Item also gy uns hebben gescreven van den syden dinghe also van den taften, de wy hebben, dat men jue senden sole in[WS 1] Vlanderen, dat en doch nicht gedan, et is gene gadinghe to Vlanderen wart. De Ruessen unde Sweden mosten se weder kopen; dat men dat holt in den walt vorde, dat en duchte my gen rat wesen. Wy welt des besten ramen, wy hadden dar so gerne en ende van also juewer ergenen, konde wy
Anmerkungen (Wikisource)
- ↑ Vorlage: ln
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 444. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_444.jpg&oldid=- (Version vom 31.7.2018)
