Dat hebbe ic ju wol ghescreven in mynen laesten brieve und ic bereyde my alle daghe, zo ic oersten can, om to Colene to treekene. Und als ic weder van Colene come, zo wül ic juwen zone ter scrifschole zetten und wat ic ju van gelde zende, dat zal jue in de hant comen; voert zo begherdy dat Pieter van den Damme myne warben op draghe om ju mede to verborghen ut ter vanghenissen und dit zoldy Pieter hebben laten vornemen an Yorus Spighel, oft he hem to borghen nemen wülde met mynen warben und teghen dat ic weeder weder van Colene come waer, dat ic yu mede to helpen comen can, dit en wil ic nicht laten op dat jue ghehulpen mochte worden zonder arghelist. Voert zo biddie, dat ghy is to brede zettet, want al mocht my eenen gulden duezent guelden vromen, ic en con ju nicht ghehulpen, voer dat ic van Colene come nicht meer. Dan God spare ju ghezont und late ju met lieven utcomen. Ghescreven des maendaghes na groet vastelavent.
395. Herman Platenschleger an Hildebrand Veckinchusen in Brügge. – 1425 März 12.
- Rev. St.-A. Orig. Pap. Adr.: An den erbaren Hildebrant Veckynghuesen to Bruegghe detur haec littera. Darunter von H. V. Hand: 8 dage vor pinxsten 1425 jar.[1]
1. Salutibus praemissis. Wetet, leve vrunt Hildebrant, dat yk juwen bref wol vornomen hebbe. Item, leve Hildebrant vrunt, gy weten dat wol doe wy latest tosamene spreken up unser vrowen kerkhove Gyryk und Bertram, wo wy denn ens worden, dat wy darup weren vorseen, dat wy guet schyckeden oft pagemente, dat wy de vygen mochten mede betalen. Aldus so sande yc in Flanderen an wasse und an lywende, dat darvan wart 100 ℔ groten und wat mer. Ok so betalede yk Ghert de Graven deme klereke 40 ℔ groten. Ok so dede yk Bertram mede an reden pagemente 200 ℔ groten 20 ℔ groten. Dyt pagement untfengh Hermen Darssouwe van Bertrames also Hennen jue sulven wol segghen scal; yd en ys myn schult nycht, yc hebbe hirby ghedan, also wy ens worden up unser vrowen kerkhove to Lubeke. Ik hadde Bertram mer gheldes mede ghedaen wan vor de vygen borende. Ok so was yd my untwytlyk, dat syk Bertram leet leyden to Bruegge, so help my Got, he hadde mer geldes myt syk dan wy dar schuldich weren van den vygen. Leve Hildebrant, gy schreven my overme jare 1 bref, ok sedet my Brekerfelde sulven, dat gy und juwe wert worde ghemant umme 60 ℔ groten van den vygen vor juwe part na deme dat yd ys in twen herberghen ghekoft ys aldus so steyt hir noch to juwer behof 350 marc Lub. 10 marc up de 60 ℔ groten van Bertrames wegen. Yc quam nouwe by syn hus, dar dyt ghelt ane lycht. Bertram sede my, he hadde syk myt her Johan Barthune vordregen umme de ander 60 ℔ groten dar rade Bertram. Item so hebbe yk gheven Evert Moyelken 100 marc und 35 marc van juwer wegen. Item so hebbe wy noch in schult 76 korfe vygen, yc en kan yd nycht inmanen, de lude synt vorstorven und
- ↑ 1425, Mai 20.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 409. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_409.jpg&oldid=- (Version vom 31.7.2018)
