344. Hildebrand Veckinchusen in Brügge an Johann van Emmeren, Everd Moyelyk, Heinrich op dem Orde, Tideman Brekelvelde, Bertold Herentrey, Sivert und Margarethe Veckinchusen. – 1423 Januar 5.
- Rev. St.-A. Abschrift. In dorso von der Hand des Briefschreibers: Dyt es dey ander koppye van enen breyve an her Johan van Emmeren, Evert Moelyk, Hinryck op den Orde, Tydeman Brekelvelden, Bertolt Herentrey, Syvert unde Margrete Veckinchusen, elk by sunder sal de breyff in Lubeke, 1423, 5 daghe in jannewario.
Vruntlike groete tovorn ghescreven. Leven vrundes, ic beghere van ju sere vorsteliken met oetmodigher herten und bidde ju umme Godes willen und umme des rechten willen, dat ghi vor onse heren van Lubeke gaen und bidden zy, dat sy alzo wol willen doen und scriven an de stat van Brucge enen breiff van mynen zaken, dat zy darin int eirste scriven die utscrift van der kennisse und dat zy daerby scriven, dat zy my kennen vor eren porter und begheren van der stat van Brucge to weten, ofte ick Jacob Schoteler so vele mysdaen hedde in Lubeke, alzo he my mysdaen hevet und Jacob vorscreven up my alzulke kennesse hedde als ick up eme hebbe, wat solde myn loen daervan syn in Lubeke und ick daer were en my alzulke kennesse up den hals queme van der stat van Brucge und begerden recht over my van der stat van Lubeke na utwysinge der kennesse, so solde ick my nicht wol vorantworden kunnen to eren noch to rechte, so my duncket.
Item achte daghe vor pinxsten do was ick in die vierscharen to rechte, so dat dat recht upgheschoten wart up pinxst avent, so dat Jacob vorscreven vornam, dat ick solde quyt ghewiest werden van dem Lombarde, do meynde Jacob, he wolde my doen vangen, so dat he my in den steen wolde bevellen hoger so he meynde, aldus ginck dat to, dar he cleyne ere an my begaen hevet na der kennesse und na anderen reden und na brieven, de ick van synre hant hebbe, de he my to Colen screiff, der he nicht vele ghehaelden en hevet. Ic hebbet altomale contrarie ghevonden, God gheve eme daervor syn rechte loen.
Item Jacob Schoteler quam up pinxst avent vor den steen met des heren knapen alzo ick solde ut deme steen gaen met myns heren des provestes deyners to rechte in die provestie, dar wolde he my hebben doen vangen tuchsschen der vangenesse end provestie und deme rechten ut myns heren des provestes synre herlicheit und wolde my vorder belastet hebben in de vangenesse dan ick was, dit is wol witlick den heren van Brucge, alzo borgermeisters scheppen und raede, de vor desser wet weren und ock eist deme proveste wol wetlick met syme raede and wet. Darmede volbrachte Jacob Schoteler synen quaden willen, mer God danck he en venck my nicht noch nummer en zal, welt God, alzo ich ghevangen wart, wo dat by comen is, dat weit he wol. End als ick sach, dat Jacob vorscreven in der wys vor dem stene was umme my in merre last to brengen, do sante ick ter stont int recht an mynen heren den provest und leit eme dat weten und deme rechten, dat ick met zeker mochte comen in syn herlicheit to rechte, alzo
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 359. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_359.jpg&oldid=- (Version vom 31.7.2018)
