Wetet leyve broder dat myn suester unde juwe kynder syn Got hebbe danc al wol ghesont unde hyrnest al unse vrunt syn Got hebbe danc redelyken ghesont. Got spare uns al umme to syme gotlyken deynste unde geve uns aller sorge eynen guden eynde; unde ic hebbe wol 6 weken cranc ghewesen unde ic bevruechte my eyner swaren sueke. Got betert und vorsey unse beste to ewycheyt. Unde gy scryven sware breyve over my an myn suester unde dey vele vordreytes mochten maken unde kunnen nicht gudes inbrengen unde ic hebbes nicht verdeynt unde gy doen my vor Gode unrecht unde ic hadde al hopet gy solden utkomen hebben unde dat ic suelven met ju hyrumme mochte sproken hebben unde my vorantwordet hebben. Got geve dat ic dat noch leven mote unde ic hope des nummermer, dat gy by alsolken degdyngen blyven wellen unde my dunket jo ic mer doe, ic ju myn ghenoget, unde ic kan nicht wol bet. Unde ic wolde dat gy al dync also wol wysten also myn dync ghelegen es. Gy solden my neyn schult geven. Got beter al dync dey hevet des wol macht. Ic wet ju wol mer scryven men al vrunt doen ju sere groten. Ghescreven op sunte Mertyn anno 22 jar.
341. Hildebrand Veckinchusen an Johann van Emmeren, Everd Moyelik, Heinrich op dem Orde, Tideman Brekelvelde, Bertold Herentreye, Sivert und Margarethe Veckinchusen in Lübeck. – 1422 Dezbr. 21.
- Rev. St.-A. Abschrift, die außer dem, was hier abgedruckt ist, noch enthält die Abschriften des Vertrages zwischen Hildebrand Veckinchusen und Jacob Schotteler (Nro. 338) und des Schreibens von Lübeck an den gemeinen Kaufmann zu Brügge (N. 342). Das Stück ist nicht von Hildebrand Veckinchusens Hand geschrieben; wohl aber ist in dorso von seiner Hand vermerkt: Dyt es enne koppye, dey ick sante an her Johan van Emmeren, Evert Moyelyk, Hinrych op Morde, Tydeman Brekelvelden, Bertolt Herentreye, Syvert unde Margrete Veckinchusen by Wydouwen den loper 4 dage vor Kerst daghe 1422 jar.
Item dit zynt de vyff ponten, de my schelen in der vorscreven kennessen[1] als hyr na bescreven staen. Item so is dat eirste pont certificeren dat beghere ick in duetschen to hebben als vorzekeren, dat is als in ghewaren ghetuchnisse. Dat ander pont, dat my daran ontbreket, dat is van der herberghen ter Gans een underscheit, to Antwerpen zynt twe herberghen ter Gans gheheiten, die eyne is up dem kornmarket dat was dar dit ghescheide, die ander is gheleiten in der borch. Item dat derde pont dat my daeran ontbreket, dat die brieff ynhelt Jacob Schotteler an de eene ende Hildebrand Vockinchusen an die ander zyde, dar ghebreket ane die zyde van Jacob Schoteler. Item dat vierde pont is dit, dat my daran ontbreket, dat men Jacob Schoteler kennet porter to Brucge ende my niet borgher to Lubeke
- ↑ Bezieht sich auf den Vertrag zwischen ihm und Schotteler.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 355. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_355.jpg&oldid=- (Version vom 31.7.2018)
