Unde ik vruchte wy moten des al untgelden, wante he wer ju en grot trost und hulpe wezen unde gy en dorven ju hirup numende mer vorlaten enych geld mer vor ju uttogeven, sunder gude borgen edder pande, Got betert. Item ik hebbe myn dochter in den namen Godes vorlovet, alzo ju Engelbrecht wol berychten sal, God geve to ener salygen tyd. Ick wolde, dat gy unde ander vrund hir to der brutlacht wezen mochten. Hedde ik bet gedan kont, dat were my leff doch hope ik des besten. Gescreven 9 dage vor unser leven vrowen dage natyvytas anno 22.
337. Tideman Brekelvelde an Hildebrand Veckinchusen. – 1422 Septbr. 21.
- Rev. St.-A. Orig. Adr.: An Hildebrand Veckinchusen littera detur. In dorso von der Hand des Empfängers: 1422, 10 in october.
Vruntlike grote unde wes ik gudes vormach tovorne screven. Wetet, Hildebrant, gude vrunt, dat ik juwe breve vuste all wol vornomen hebbe unde woldet so dor ghan alse gy scriven, so weret gut; gy scriven my, dat ik van Hinrik Brinkman nemen solde 14 mark 4 sl. vor de 2 ℔ grote. Desse hetet Hinrik Brinkman, de hir op der apoteken is, unde de en gheve my nicht 1 ₰ van des mannes wegen, deme gy dat ghelt ghedan hebben unde deme gy et ghedan hebben, de en hevet nicht wat sal he dan gheven. Doch ik en wet nicht vorwar, off Hinrik Brinkman de hovetman sy. Item Lammeshovet, de en wel der suben neinerleye wis vor so vele gheldes hebben, he koffte hir 1 pels vor 18 sl. unde he secht, de sy byna so gut alse de sube, dar he 7 mark vor gheven solde.
Item alse gy scriven van der Luneschen, wo se dat hus winnen welle vor de renthe alse vor 50 mark nochtant, so hebbe se gude pande. Hildebrant, de pande en weren so gut nicht alse 50 mark, doch alse ik vornomen hebbe, so hevet se de 50 mark betalt op 16 mark na. Hildebrant, hir dede ik er 10 mark to, also dat ik er nu ghedan hebbe by 50 mark men truw, (?) Hildebrant, ik en kan des nicht ghewesen, dat ik mines gheldes also enboren moghe. Ik hebbe en deels smide van er, dar en kan ik nicht mede to den markete. Gy scriven nu van der Luneschen unde en scriven nicht van her Hinrik Rapesulver unde de wel sin ghelt ok hebben. Gy screven vuste, dat gy des huses nicht gerne enberen en wolden, seker, Hildebrant, ik en wet, wo men eme best don sal. Greteke lecht dar inne unde mot dar des jars vor geven 25 mark. Et dede er wol 1 hus dar se ume 8 mark inne wonnen mochte. Ik en vorsta my desser sake nicht, men ik wet wol, wanner dat Greteke al vorpandet hevet dat se hevet unde vorteret hevet, so moste se alyke wol eten. Hedde se wat, Hildebrant, en vorkerdes my nicht, dat ik et ju aldus groff scrive, wante ik se wol dat juwen brodere unde eneme yewelike banghe noch mit den sinen wert. Weret dat wy enen kopman hebben konden to deme huse, so duchtet my nutte wesen, dat ment vorkoffte, mer vorwar, Hildebrant, en hus, dat over eme jare 1000 mark wol ghelden hedde, dat en solde nu nicht 900 ghelden. Dat komet darby to, dat hir nein dont
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 352. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_352.jpg&oldid=- (Version vom 31.7.2018)
