Sant kümernus

Editionsrichtlinien:

• Als Grundlage dienen die Wikisource:Editionsrichtlinien
• Die Wiedergabe folgt in der Schreibweise (u/v usw.) und hinsichtlich der Groß- und Kleinschreibung der Vorlage. Allerdings wird zwischen Lang- und Rund-s nicht unterschieden.
• Abkürzungen werden aufgelöst.
• Übergeschriebene Buchstaben werden mit <sup> hochgestellt, also zum Beispiel u^o

Sant kümernus

Mirabilis deus in sanctis suis

Got würckt wunderbare ding in seinen hailigen

Es was eins haydnischenn küniges tochter die was scho^en vnd weyß. Darumb ain haydnischer künig ir zu^o ainem gemahel begeret das was der junckfrawen layd. wann sy bett got auserwo^elt zu^o ainem gemahel Das thet irem vatter zoren der leget sy gefangenn Do ru^effet sy got in der gefa^engknuß an vnd batt yn das er ir zu^o hilff ka^em. das geschach. vnnd kam got zu^o ir in die gefa^encknuß vnnd tro^estet sy. Do begeret sy das er sy verwandelt in so^elche gestalt. das sy kainem auff erdtrich geuiel sonder ym allain. Vnd das er sy machte wie sy jm am besten geuiel. Do verwandelt er sy vnnd macht sy im geleich. Do das ir vatter sach. fragt er sy warumb sy also la^ebe. do sprach sy. Wem gmahel den ich mir außerwo^elet hab. hatt mich also gemachet. wann sy wolt sunst kainen dann den gekreützigten gott. Do erzürnet ir vater vnd sprache. Du mu^ost auch am kreütz sterbenn wie dein got. des was sy willig. vnd starb am kreütz Vnd wer sy an ru^offt in kümernuß vnd anfechtung dem kam sy zu^o hilff in seinen no^etten. Vnd haißt mit namen kuminis [?] vnd wirt genant sant kümernuß. vnd ligt in holand in ainer kirchen genant stouberg. Do kam ain armes geygerlin für das bild vnd geyget so lang biß ym das gecreütziget bild ainen guldin schu^och gab Den nam er vnd tru^og yn zu ainem goldschmid vnd wolt yn verkauffen Do sprach der goldschmid. ich kauff sein nit. villeicht hast du yn gestolen. Do antwurt er. nain. das gekreütziget bild hat mir yn geben. man ko^eret sich nit daran vnd fieng yn vnd wolt yn hencken. Do begeret der geyger das man yn wider zu^o dem bild fu^eret. das thet man. vnd thet dem bild den guldin schu^och wider an den fu^oß. do geyget er wider wie vor. Do ließ das kreützget bild den schu^och wider herab vallen. Des ward der geyger gar fro. vnd dancket got vnd sant kümernuß.