S Nähnis Strofred

S Nähnis^[1] Strôfred.

Der Winter ischt koi’ Winter maih,
Der Früahling louter Schmotz und Schnai,
Der Sommer auhne^[2] Heu und Klai,
     Ischt des a Waih!

5

Z Michöli^[3] sind jetz d Bluama schau’

Vom Reif verbrennt, ischt brau’ der Zau’.
Wear ka’ dia Zeita noh verstau’?
     Wa hau’ mer thau’?

Jetz hau’ mer Eins^[4] anstatt em Staub

10

Und Beasareis anstatt em Laub!

D Wealt abat^[5] mächtig, wieni glaub,
     Und, mit Verlaub,

Was möcht am Elend schuldig sei’?
Der überaltat Sonnaschei’?

15

Gealt,^[6] eusa Herrgatt obadrei’?

     I bild mers ei’!

O Menschawealt, so überglaihrt,
Wia bischt du doch so ganz verkaihrt!
Du hôscht di seall uffs Mark versaihrt, ^[7]

20

     Du seall! Hôsch ghairt?

Dei’ Übermuot, des ischt der Queall,
Dei’ Gscheidi, merk ders, du Rebeall,
Dia gearbt der jetz dei’ sündigs Feall,
     Jetz hilf der seall!

---

1. Großvaters.
2. Ohne.
3. 29. Sep.
4. Eis.
5. Geht abwärts.
6. Gelt, nicht wahr.
7. Versehrt.