Ob allen frowen frowe
[351v]
Ob allen frowen frowe·
reinv́ mv̊ter vnd maget·
hoh erborne goͤtes tohter vnd sin brvt·
wer kan diner tvgende richheit volleklich erzeln·
rose in himel tǒwe·
svnder sv́nde dorn bedagt·
dv bist vor den creatúren gotes trut·
er gerůchte dich vs al der werlte im selbe erweln·
din lob ist allen zvngen vberkrepfig vnd zestark·
wer koͤnde selke kraft erspannen·
got sich menschlich in dir barg·
svnder mannes helfe din lib den gebar·
dem alle kúnige mvͤssen mannen·
ǒch dient im der engel schar·
dv bist aller frowen schilt vúr trewis·
den in eva brahte vmb einen kleinen apfels bis·
Svnder besich die strâssen·
in der werlte war si gan·
wannen dv sîst komen alder wie din leben si·
war dv wellest so dv mit der werlde vúr dich verst·
sich wie si hat gelâssen·
die die si niht wolden lân·
la die werlt ir wont ein biter ende bi·
sich vúr dich die straze wie dv die zv̊ dem tode kerst·
sih hinder dich wie not dir von dem reinen schoͤpfer ist·
des lib sich an dc krúze here[WS 1]
vúr vnsich bot der svͤsse crist·
wilt dú des gedenken was er dvr dich leit·
sich vber dich was wunne vnd ere
dir zehimel ist bereit·
vn̂der dir besich die iemer wernden not·
in der helle schúhe vnd flúhe· den eweklichen tot·
Dv́ werlt hat manig wunder·
vf dem lande vnd in dem se·
des wir niht beschowen mvgen dc ist vns kvnt·
von dien bv̊chen vnd ǒch von der wisen lúte sage·
mich wundert gar besvnder·
wie dú erde stille ste·
wa der wag an ruͤre grundelosen grunt·
wie dú naht sich berge vor dem liehtebernden tage·
des lassen wir den schepfer walden der weis sin geschaft·
vnd merken an die tvmben lúte
die niht vúrhtent gotes kraft·
iegelich creatúre erkennet wol ir zit·
niht her [352r] wan dú tier in menschen húte·
dú sint gotes wider strit·
vssen menschen vnd innen wolf· nv fris dc lamb·
swc nih an den hanen si dc roͤter doch der kamb·
Ze rome stv̊nt gemalet·
listeklich an ein ner want·
manig lant ieglichem hieng ein gloͤglin obe·
saste sich der keines wider des schelle lute sich·
da wart niht me getwalet·
romer fůren vs zehant·
vnd betwungen es dem riche sa mit lobe·
lute man zesturme in allen landen duhte mich·
dem riche nv kleine hilfe keme da von nimt es abe·
pfaffen fúrsten hant niht rehte
infel vf hǒbet krvmber vf stabe·
dienstman mv́nze zoͤlle in ache stat der stv̊l·
der babest hat des stabes nv dc slehte·
si malent ǒch da der keiser mv̊l·
des riches sint die klien so wirt in der kern·
da von lant die herren dc riche kv́niges wol embern·
Wan balsemt edelliche·
vúr des argen rukes smak·
dc ein totes bilde deste langer wer·
wc svln wir dien tvgendelosen strichen an·
dc in dú erge entwiche·
balsme in niht gehelfen mag·
vúr den siechtv̊n ist niht gv̊t wan eren ger·
der die wol bescheidenliche an sich strichen kan·
ein gv̊t behv́gde ist besser danne si des balsmen tror·
si wirdet toten vnd lebenden·
si treit wunsch in gotes or·
si hat manigen vor der helle vúr ernert·
got gab vnd git noch gerne gebenden·
riches argen lob veruert·
sam ein krak der von dem donren bringet schal·
dar zv̊ senket in sin habe in iemer werenden val·
Die froͤsche wilent nâmen·
ein geschre dc rǒ si sider·
zv̊ zir gote der solde in einen kúnig geben·
also schriwen si tag vnd naht vs einem witen sê·
do lies er einen tramen
vf si von der hoͤhe nider·
den er vorhten si bis er begvnde sweben·
vf in hvbten si zehant vnd schriwen nach kv́nige als e·
do sant er einen storch al dar der slant si svnder zal·
wir sin die froͤsche die da schrient·
dc riche ist des tramen val·
vf sint gesessen arge froͤsche nv·
die sint des riches eren vient·
storche wenne kvmest dv·
die des riches[WS 2] erbe slindent der ist vil
trib si wider in eigen hol der dú niht slinden wil·
Swer git der ist der werde·
swer niht en hat der ist vnwert·
also sprach ein kv́nig der was dauit genant·
ich hate manigen lieben frúnt do ich bi gv̊te was·
die smahent mich vf erde·
ir keiner min zefrúnde gert·
dien ich dike han gebotten mine hant·
die kerent mir den rugge zv̊ si sint mir mit gabe las·
ich weis vil wol swer selbe iht hat· dc ist gv̊t vúr den zorn·
schade scheidet liebe mage
die doch vil nahe sint geborn·
dc liebe kint die mv̊ter sin dú es gebar·
den vater gruͤsset es vil trage·
vnd nimet sin vil kleine war·
in armen mannes mvnde ertrinket wize vil·
swer in dem sekel niht enhat dc ist ein hertes spil·
Kristere der wunderere·
dv bist einer dv bist dri·
dv wer ie vnd mvͤst ǒch iemer ewig sin·
doh darvnder woldest dv der wunder niht enbern·
dc dih ein magt gebere·
kv́sche vnd alles wandels vri·
ein blvͤndú gerte von ýesse der selden schrin·
din gebvrt dú kan vns armen maniger froͤiden wern·
von dem svͤzen worte aue da von din lib enpfie·
den werden hohgelopten got·
der an dc krúze dvr vns gie·
vnd adamen loste vnd ǒch die helle brach·
sin zeher vnd sin weinen·
wante vnser[WS 3] vngemach·
so bit ich dih hoh gelopte trinitat·
dc dv mir zen froͤiden helfest dú da niht zergat·
Trost al der kristenheite·
kristes mv̊ter vnd magt·
svnder galle ein tvbe svnder rose ein dorn·
reinú arke wol geworht vúr alle vnkúsche frůt·
nv bist dv min geleite
sit din svn dir niht verseit·
an dem ende wende frowe sinen zorn·
ich weis wol swest an in gerst dc er dc alles tůt·
dv mane in sis gewaltes sit dc er gewaltig ist·
dv mane in siner wisheite·
sit dc er dú wisheit ist·
dv mane in sinr erbermde dv́ ist so manigvalt·
sit dc dv tvgenden waltest frowe·
ich bin in sv́nden worden alt·
der en kvnde niht so vil vf mir gesin·
dinr erbermde si noch me genade erbarmerin·
Got der vs einem steine
vrisches wasser vliessen hies·
dc ein ganzes her vnd als ir vihen getrank·
in einer wuͤstvnge da nie brvnne mer geflos·
hilf mir dc ich beweine·
sv́nde der ich niht enlies·
in der ivgende des dú menscheit mich betwang·
din svn an dem [352v] krúze blůt vnd wasser vúr vns gôs·
nah dem alle kristen heissen vnd dú kristenheit·
diner wunder ist niht eines·
din kraft himel vnd erde treit·
menschen sin vnd ir gedank sint dir wol kvnt·
es wart nie troͤpfel alse kleines·
an des tiefen meres grvnt·
dv dvrzelst es wol vnd aller wasser gries·
din wisheit got herre ob aller wisheit werden lies·
Maniger saget mere·
von rome dú er nie gesach·
also wil ǒch ich úch ein mere sagen·
ein snegge vúr einen lehpart wol tvsent klafter lang sprang·
dc mer stat wassers lere·
von einer tvben dc beschach·
du trank es vs dc hôrt ich zwene vische klagen·
die vlugen da her von nifen vnd svngen nv́wen sang·
ein hase zweine winde vieng do si in solten iagen·
do sach ich starker wolve viere·
die hat ein altes schaf erslagen·
do sach ich einen reiger eines habches gern·
vnd vieng in in den lúften schiere·
do sah ich einen wîssen bern·
den vieng ein wilder esel an des meres grunt·
des half im ein salamander den waren div wasser kvnt·
Ein wunderliches kunder·
gargon es geheisen wc·
wilent swer dc hǒbet sach der wart ein stein·
bi der zit ein ritter lebte der hies antheus·
den nam des michel wunder·
dc nieman vor im genas·
er wart in sinem mv̊te des enein·
dc er macht ein kristallin schilt vnd trůg den svs·
vor sinen ǒgen er sach es dur den schilt vnd streit
mit im· er slůg es so manliche·
dc man es noch von im seit·
ir werden fúrsten merkent disen list·
dem ritter svlt ir úch gelichen·
swa ein valsches hǒbet ist·
secht es dvrh eren klaren schilt·
vnd slahet es wan es keiner arger dinge niht bevilt·
Dú tier zesamne kamen·
vnd wolten einen kúnig weln·
eln vnd vrn wisent vnd helfant lewen vnd bern·
hirz vnd einhorn swc vier bein hete des kom vil aldar·
misslichen krieg si namen·
des enkan ich niht erzeln·
ein krotte dú kam ǒch dar dú wolte niht enbern·
si wer an der wal des namen dú tier dvr spotten war·
si sprach ich han ǒch vier bein ich wil han dc kúnigriche·
der lewe sprach bosheit var verwassen·
dv bist tieren niht gelich·
si blâte sich noch grosser hie mitte si gar zerbrast·
dc dis bispel kvmt den zemâssen·
die eren gern vnd sint ir gast·
da von dc nature an im niht tvgenden treit·
swa vro ere wol gevert dc ist vro schanden leit·
IN elementen vieren·
vier geschepfde hant ir leben·
in dem luft ein vogel vnd in dem wage ein visch·
in dem vúr ein wurn vnd in der erde ein klein tierlin·
vogeln vischen tieren·
wúrmen hat got selch nature gegeben·
dc ein iegslichs ist in siner arte vrisch·
vnd dú den werden menschen mv̊zen vndertenig sin·
die meister iehent dv́ werlt dú si alsvs geteilt in drů·
ein teil heis vnd gar vnfrúhtig·
da wahset weder korn noch sprú·
dc ander kalt dc kein mensche darvffe niht beliben mag·
dc dritte ist luftig vnd genuhtig·
dar inne vinden wir beiag·
dc wir vns vor hvnger vnd vor dvrst ernern·
da bi svln wir vnser tage nach gotes hvlden zern·
Es sprechent zwiuelenre·
sang vnd froͤide si veruarn·
noch wil ich mit sange kv́nden vnd sagen·
es lebt noch maniger werder man der schoner vroͤiden gert·
gv̊t zit ist froͤidebere·
man sol sang wilent bi wilen sparn[WS 4]·
die vogel singent niht wan bi den liehten tagen·
des húre ist mit zal ein iar dc nennet man ein vert·
ein tag ein woche ein manot ein iar gent nach ein ander hin·
der abent dv́ naht vnd der morgen·
golt silber moͤsching bli vnd zin·
kvpfer stahel vnd isen dc verswindet ǒch·
swer ellú ding wil vbersorgen·
der dunket mich der sinne ein gǒch·
zît hat ere zuht hat zierde· mâsse ist gv̊t·
ere wer gewin gefuͤge schimpf svͤze git senften mv̊t·
Des vndern vnd des mittern·
vnd der hohen ist so vil·
dc es menschen sin niht vol reken kan·
swc misselich ist vnd alles dc sich noch gemischen mag·
des svͤssen vnd des bittern·
swer den smak erkennen wil·
den betrúget liht ein mislich dar oder dan·
wc vier elemente geschefte si die naht vnd ǒch den tag·
swc fluzet flúget swimmet krúchet stet [353r] get oder krist·
wie sich die sternen in lǒfe ruͤrent·
wie der himel geechset ist·
siben planeten kraft der heissen snvͤre mes·
swa si donre vnd wint hin fuͤrent[WS 5]·
swa der abgrunt hat sinen sez·
regens tropfe erzeln mers gries gras vnd lǒb·
swa sich der regenboge nimt in kleiner svnnen stǒp·
Lebt von der vogelweide·
noh min meister her walther·
der venis der von rugge zwene reimar·
heinrich der veldeggen wahsmv̊t rubin nithart·
die svngen von der heide·
von dem minne werden her·
vn den vogeln wie die blv̊men sint gevar·
sanges meister lebent noh si sint in todes vart·
die toten mit den toten die lebenden mit den lebenden sin·
ich vorderte zegezúge·
von heinb̃g den herren min·
den sint rede wort rime in sprúchen kvnt·
dc ich mit sange nieman trúge·
lihte vinde ich einen vunt·
den si vunden hant die vor mir sint gewesen·
ich mv̊s vs ir garten vnd ir sprúchen blv̊men lesen·