Nv wil aber der kleinen vogele singen

NV wil aber der kleinen vogele singen·
dc ist war·
hie nie niht langer sin·
also wil der leide winter twingen
ellú iar·
liehter blv̊men schin·
ich enkan in dem walde niht
ein gruͤnes krenzel vinden·
wa mitte sol min froͤiden trost
ir reides har bewinden·
der man schoͤne bi der gvͤte giht·

Do min ǒgen si alrerst ersahen·
wol der zit·
dc wc min gemach·
do sas ich ir svnder hůte nahen·
dc mir sit
niemer mer geschach·
wie si hiesse des vragte ich·
do iach si balde schone·
si seite so ie lenger so
ie lieber got ir lone·
also hat si mir genennet sich·

E dc si anders iemen lieber were·
danne mir·
sanfter wer ich tot·
ich han sus der^{[WS 1]} herze langen^{[WS 2]} swere·
vil von ir·
vnd der senden not·
ich bin ir ie lenger so
ie leider vor genennet·
o we das mich ir gvͤte niht
genedeklich erkennet·
da von wird ich lones selten vro·

Als ich gemeineclichen mv̊s gebaren·
so ist ir spot·
alles dc ich gesage·
vnd giht ich welle ir eren varen·
nv dvr got
hoͤret mine klage·
si wil dc ich vremde si
vnd dar mit trúwen sinne·
si mag es han vúr sie sie will
ine^{[WS 3]} hans niht vúr minne·
ich sol dir eteswenne wachen bi·

Anmerkungen (Wikisource)

1. Vorlage: die.
2. Vorlage: lāge.
3. Vorlage: me.