Nv wil aber der blv̊men schin

Nv wil aber der blv̊men schin·
zende^{[WS 1]} sin·
vnd der kleinen vogellin sang·
owe min her rife kalt·
den gewalt·
schaffet ir den kinden al zelang·
da von truret mir der mv̊t·
dc dú not·
machet min vrowen vuͤze dike rot·
die sint vor dem winter vmbehv̊t·

Des mich tvmben sit verdros·
ia beslos·
húr ir brůder alles ir gewant·
niwan mir zeleide gar·
offenbar·
hat ers anderhalben hin gesant·
dc si min engelten mv̊s·
alle tage·
dc ist mins herzen klage·
si erbot mir doch nie minnen grůs·

Si ist so noch genůge sint·
gar ein kint·
vnd doch an dem libe niht zekrank·
schone stete rehte gůt·
wol gemv̊t·
von den schvlden eret si minne sang·
an den zúhten niender lam·
Vil gemeit·
da von ie min herze nach ir minnen streit·
sist mir lieb ich wer ir gerne sam·

Laz ich in des get mir not·
er verbot·
ir dc si mich miden solde gar·
da von han ich herze ser·
alles her·
nimt min ir genade kleine war·
ie doch ist min herze da·
swie si tůt·
vnd wird er niemer drvmme wol gemv̊t·
es en minnet niender anderswa·

Truͤge er iender holden wan·
als ich han·
siner swester lange her getragen·
so vergêsse er lihte min·
sol er sin·
vngenade mir geliche^{[WS 2]} clagen·
ich han alles ane reht·
sinen zorn·
vnd han min singen da bi doch verlorn·
also leb ich freudeloser kneht·

Liebe froͤideloser kneht·
es ist reht·
dc ich dir mit trúwen bi geste·
sit dv lange hast geklaget·
dir si leit·
diner frowen tv̊ der winter we·
an ir linden vuͤzeline·
si es dir so·
beherzent· nv wis vro·
die wil ich erwermen vnder beiden v̊hsen min·

Anmerkungen (Wikisource)

1. Vorlage: ende.
2. Vorlage: gelich.