Nv solt ich die schonen zit
[309v]
NV solt ich die schonen zit·
gruͤssen die der meýe git·
nv mv̊s ich in sender swere worgen·
mich froͤit niht der vogel sang·
ellú zit ist mir zelang·
nah der lieben minne mv̊s ich sorgen·
mich hat enzunt·
ir roter munt·
mit der minne fúre·
dc betwinget swen si wil vnd ist doh gehúre·
Schoͤne schoͤne schoͤne schoͤne troͤste mih·
la mich frowe erbarmen dich·
[310r] Swer herzelieb ie gewan·
es sin frowen alder man·
der sol sich genedeklich erbarmen·
er sol bitten vber mich·
dc si tvͤýe tvgentlich·
vnd si troͤste mich vil senden armen·
der svmir schin
der frowen min·
schone wol geliche·
wirt mir da bi guͤte erkant seht so bin ich riche·
Schoͤne schoͤne schoͤne schoͤne troͤste mih·
la mich frowe erbarmen dich·[WS 1]
Es moͤht in die felsen gan·
dc ich her geflehet han·
vnd moͤht ǒch herten vlins gelinden·
wer ir herze ein anebos·
sost min klage doh so gros·
dc ich wol genade solte vinden·
des meres grunt
dem moͤhte kvnt
sin min langes wuͤfen·
sit mich an der minne tor nieman hoͤret Ruͤffen·
Schoͤne schoͤne schoͤne schoͤne troͤste mih·
la mich frowe erbarmen dich·[WS 2]