Nv ist mir aber leide
[317r]
Nv ist mir aber leide·
dc vnser ǒgenweide·
die blv̊men an der heide·
dem winter[WS 1] niht kvnnen vor gesten·
die sint klagebere·
noh dulde ich eine swere·
da zv̊ bin ich vnmere·
einem [317v] wibe dc mv̊s mir nahen gen·
dc ist nv der dritte winter den ich han gesvngen ir minen sang·
wil si dc ist zelang·
sit ich mit trúwen ie nah ir hulden rang·
Wesse ich wa ich svnge·
da man mich dike drvnge·
vnd mir wol gelvnge·
da vund ich noh niwes eteswas·
wc mag ich nv vinden·
den wisen vnd den kinden·
dú milte wil verswinden·
dar vnder sost min froͤide las·
geben mir die herren mer so moͤht ich wol volenden den willen min·
leider svs mv̊s ich sin·
lange versvmet ich meine ein[WS 2] vrowelin·
Nv sihe ich an ir mv̊te·
geb ich ir in ir hv̊te·
eine vehe chv́rsen gv̊te·
si liesse sich gar vf minen eit·
ê ich die gewinne·
so han ich gar die sinne·
verlorn vmb ir minne·
besvnder ist dc min herzeleit·
swc ich disen winter mit geheisse mag erwerben vnd al dc iar·
nimet min ir gvͤte war·
vnd ir genade dc gib ich alles dar·
We wc wil si mere·
dú schone niht zehere·
mag si dvr ir ere·
mir lazen noch von ir geschehen·
sold ichs vmbevahen·
so were ic froͤide nahen·
min ǒgen nie gesahen·
so lieb als si da solden sehen·
wie sere ich des engilte dc ich klein gv̊t gewinne dc ist mir leit·
dike si mir verseit·
da von ich lide vil sender arbeit·
ICh enwil niht twingen·
ich sol gevv̊ge singen·
nach ir genaden ringen·
die lange min hze hat erkorn·
ich horte ie dc schelten
mit vnfůge gelten·
da von ich schilte selten·
ich fúrhte der vngefuͤgen zorn·
ich wil noh von blv̊men singen dvnket es gefvͤge vnd alle reht·
froͤlichen sol der kneht·
húre aber reigen ir ivngen da beseht·