Nv ſol d̾ keiſer here

Nv ſol d̾ keiſer here·
vúr bꝛechē dur ſin ere·
deſ lantgauen miſſetat
wā er waſ doch zware·
ſin vient offenbare·
die zagē trůgē ſtillē rat·
ſi ſwůrn hie ſi ſwúrn doꝛt·
vn̄ průftē vngetrúwē moꝛt·
vō rome fůr ir ſcheltē·
ir dvf enmohte ſich niht v̾heln·
ſi begvndē vnd̾zwiſchē ſteln·
vn̄ alle eīander meldē·
ſeht diep ſtal diebe
div tet liebe·

Der miſſenere ſolde·
mir wandeln ob er wolde·
minē dienſt laz ich alles varn·
niwan min lob aleine·
dc in mī lob iht meine·
dc kan ich ſchone wol bewarn·
lob ich in ſo lob er mich·
des and̾n alles des wil ich·
in mīneclich erlazen·
ſin lob dc mv̊s ǒch mir gezemē·
oder ich wil mines her wider nemē·
ze hove vn̄ an d̾ ſtraze·
ſo ich nv genv̊g
warte ſiner vůge·

Ich han dē miſſen̾e·
gevvͤget manig m̾e·
bc dāne er nv gedenke min·
wc ſol dú rede beſchoͤnet·
moͤht ich in han gekroͤnet·
dú krone were húte ſin·
het er mir do gelonet bc·
ich diente im ab̾ etewas·
noh kan ich ſchadē v̾tribē·
er iſt ab̾ ſo gevuͤge niht·
dc er mir biete wandels reht·
da lazen wirſ belibē·
wc vil v̾dirbet·
deſ mā niht enwirbet·