Minne twinget mich (Mit aufgelösten Abbreviaturen)
[87v]
Minne twinget mich·
mit al ir kraft dc ich·
aber singe
von der frowen min·
die ich minnen mv̊s·
wil si so mag ir grůs·
machen ringe
mir den pin·
minne wilt dv mir·
nach mines herzen ger·
kvmber wenden·
ach wan kême es so·
der ich dienen sol·
dv́ mac mir harte wol·
fúr die grôsse dro·
Minne mac den man·
den si des vil wol gan·
trost erzeigen·
dem sis willeklichen tv̊t·
da von kapfe ich dar·
nv nimet si min niht war·
si wil neigen
mir den mv̊t·
Minne tv̊s dvrh zvht·
vnde twing die reinen fruht·
dc si meine·
mih vf herzelieben trost·
ich bin ane wer·
ir kraft ist mir ein her·
ob ich seine·
Wirde erlost·
Minne ist so gestalt·
vnd so manicvalt·
dc si[WS 1] mich machet alt·
darzv̊ bin ich gezalt·
von ir schvlden·
si tůt mir so we·
minne hilf enzit·
sit mir sorge nît·
gar ane wider strit·
nahe dem herzen lit·
ich mv̊s dvlden·
sende klage·
Minne tů mir schin·
dvr die fůge din·
sv́l ich din eigen sin·
froͤide dem herzen min
eteswenne·
do mir leit zer ge·
minne sit dc ich dol·
grôsser sorgen zol·
mache mich froͤiden vol·
sit ich so rehte wol·
leit erkenne·
manige tage·
Minne hilf enzit·
min froͤide nider lit·
nv vil lange·
sit dv mich niht troͤsten wilt·
ich bin vn erlost·
ich habe vf dinen trost·
mit gesange
herzeleit·
minne tv̊ min war·
oder ich sten froͤiden bar·
iemer mere·
swa ich in dien landen bin·
nv gedenke an mich·
vnd troͤste minneklich·
dvrh din ere
mir den sin·
Ach herzeliebe minne·
nim war·
wie gar·
mine sinne·
stellent vf die gewinne·
dc mir froͤide niht zerrinne·
Solde ich die minneklichen·
frowen
schǒwen·
tǒgenlichen·
sorge mir mvͤste entwichen·
vnd froͤide mich herzeklichen·
Ich vil tvmber
kvmber
mv̊s liden·
miden·
wil mich der froͤiden gemvͤte·
lieb nv scheide·
sorg vnd leide·
beide·
von mir din gvͤte·
Sit ich singe·
ringe·
mir swere·
lere·
froͤiden bin ich zaller stvnde·
da von lache
sorge mir swache·
mache·
froͤide mir kvnde·
wa sol ich liebe nv vinden·
sit mir·
von dir·
froͤide wil swinden·
lieb dv solt mich enbinden·
dar an solt dv niht erwinden·
noch gib mir froͤiden lere·
lieplich·
sit ich
dvr din ere·
sanc singe swar ich kere·
scheide mich von herze sere
schoͤn
doͤne·
singe ich dir gerne·
lerne
frowe den sanc die ich kroͤne·
swinde enbinde·
enbinde
mich an dem herzen·
smerzen
lide ich von kinde·
Trut la mich min gemvͤte·
ǒgen
tǒgen·
diner gvͤte·
ê dc ich seneder wuͤte·
minne mich da vor behuͤte·
sol mir din svͤsse svren·
min mv̊t
der tv̊t
niht wan truren·
bi selken nach gebvren·
mag ich langer niht getvren·
Da von wende·
swende·
mir sorge
borge·
frowe mir lieblich vor swere·
dine blike
mident[WS 2] mich dike·
schrike
sint mir gevêre·
Owe waffen·
strafen·
ich dulde·
schulde·
machet mir niht wand dv́ minne·
frowe sweine
die not alleine·
meine
noch mine sinne·
[88r] Trut minneklich
vnd reine vil svͤsse·
gar seldenrich
ob din gvͤte mich gruͤsse·
io bin ich tot
sol ich lieb niht erwerben·
es ist ein not
sol ich alsus verderben·
Ǒge mir minne
giwinne
niht sinne·
mir swache·
rose in dem tǒwe
nv schǒwe
mich frowe
vnd lache·
vor vngemvͤte
behvͤte
din guͤte
mir sinne·
la mir gelingen
an dingen
dú bringen
gewinne·
Selig si din roter mvnt
solt ich den kússen tvsent stunt
ahi·
so wer ich von sender not·
sus bin ich an froͤiden tot
owi·
tugentrichú reinú fruht
ir svnt ǒgen alle zuht
an mir·
ich wolde ane sorge sin·
wurde mir genade schin
von ir·
frowe nv tů mir so·
dc ich vil sender werde fro·
dv bist so tvgentrich
wilt dv so mv̊s zergan·
min leit vnd ǒch min trurig wan
vnd frowe mich herzekliche·
minne tv̊ minneklich
zeliebe lieblich fuͤge mich·
ald ich sten froͤiden ane·
Vnd schrie
heiahei·
min sendes herze mv̊s enzwei
vnd lebe in leiden wane·