Min herze min lip die wellent scheiden

Min herze min lip die wellent scheiden·
die mit ein ander waren nv menige zit·
der lip wil gerne vehten an die heiden·
iedoch dem herzen ein wib so nahen lit·
vor alder werlte dc mvͤt mich iemer sit·
dc si ein ander niht volgent beide·
mir habent dú ǒgen vil getan ze leide·
got eine mvͤsse scheiden noch den strit·

Sit ich dich herze niht wol mac erwenden·
dvne wellest mich vil trureclichen lan·
so bitte ich got dc er dich gerůche senden·
an eine stat da man dich wol welle enpfan·
owe wie sol es armem dir ergan·
wie getorstest eine an solhe not ernenden·
wer sol dir dine sorge helfen wenden·
mit trúwen als ich han getan·

Ich wande ledic sin von solher swere·
do ich dc krúce in gotes eren nam·
es wer ǒch reht dc es alſo were·
wan dc mîn stetekeit mir sin verban·
ich solte sin ze rehte ein lebendic man·
ob es den tvmben willen sin verbere·
nv sihe ich wol dc im ist gar vnmere·
wie es mir svle an dem ende ergan·

Niemen darf mir wenden das zvnstete·
ob ich die hasse die ich da minnet ê·
swie vil ich si geflehte oder gebete·
so tůt si rehte als sis niht verste·
mich dvnket rehte wie ir wort geliche ge·
rehte als es der svmer von triere tete·
ich wer ein gǒch ob ich ir tvmpheit hete·
fúr gůt es engeschiht mir niemer me·