Min frowe ist ein vngenedic wib

Min frowe ist ein vngenedic wib·
dc si an mir also harte missetůt·
nv braht ich doch einen ivngen lib·
in ir dienst vnd dar zv̊ hohen mv̊t·
owe do wc mir so wol·
wie ist dc nv verdorben·
was han ich erworben
anders niht wan kvmber den ich dol·

Ich gesach nie hǒbet bas gezogen·
in ir herze kvnde ich nie gesehen·
ie dar vnder bin ich gar betrogen·
dc ist an den trúwen mir geschehen·
moͤht ich ir die sternen gar
manen vnd svnnen·
zeigene han gewunnen·
dc wer ir so ich iemer wol gevar·

Owe miner wunneklicher tage·
was ich der an ir versvmet han·
dc ist iemer mines herzen klage·
sol dú liebe an mir alsus zergan·
lide ich not vnd arebeit·
die klagete ich vil kleine·
mine zit alleine·
hab ich die verlorn dc ist mir leit·

Ich gesach nie svs getane sitte·
dc si ir besten frúnden were gram·
swer ir vient ist dem wil si mitte·
rvnen dc gv̊t ende nie genam·
ich weis wol wies ende ergat·
vient vnd frúnt gemeine·
der gestêt si al eine·
so si mich vnd gen vnrehte hat·

Miner frowen darf niht wesen leit·
dc ich rite vnd vrage in froͤmedú lant·
von den wiben die mit werdekeit·
lebent der ist vil mengú mir erkant·
vnd die schoͤne sint da zv̊·
doch ist ir deheine·
weder gros noch kleine·
der versagen mir iemer we getů·