Mich mv̊s wunder han

Mich mv̊s wunder han·
wie es sich stelle bi dem rîne·
vmb den bodense·
ob der svmer sich da zer·
frankrich het den plan·
den man siht in truͤbem schine·
rife tv̊nt in we·
bi der sêne vnd bi dem mer·
dise not hantz ǒch bi ene·
da ist ir froͤide kranc·
wunne vnd vogelsanc·
ist in swaben des ich wene·
dar so iamert mich·
nach der schonen minneklich·

Lieb vnd alles gůt·
wúnsche ich ir die ich da meine·
vnd nîge aldar
einer wile tusent stunt·
ich han minen mv̊t·
gar vereinet an si eine·
swas ich lande ervar·
mir wart nie so liebes kvnt·
dú vil svͤsse reine wandels vrije·
zieret swabenlant·
hanegoͤwe brabant·
flandern frankrich picardie·
hat so schoͤnes niht·
noh so lieblich angesicht·

Swer erkennen wil·
froͤide vnd werndes hohgemvͤte·
dem gibe ich den rat·
der fúr trure sanfte tůt·
rehter froͤider spil·
ist ein wib in wibes guͤte·
dú ir wibheit hat·
wiblich mit ir zuht behv̊t·
die sol er mit gantzen trúwen minnen·
als ich tv̊n ein wib·
der herze vnd lib·
kan vf wibes lob so sinnen·
dc vs eren pfat·
niemer kvnt noch nie getrat·