Meie kumt mit maniger schoͤne

Meie kumt mit maniger schoͤne·
man hoͤrt kleiner vogel doͤne in dien ǒwen vberal·
minnekliches ist ir singen·
man siht durh das gras vf dringen·
vil der blv̊men ane zal· froͤit úch kint der lieben zit·
vnd der wunneklichen mere
ich wúnsche das dú seldenbere·
troͤste mich an der min froͤide lit·

Ein múndel rot hat mich betwungen·
das min herze ist gar berungen·
wie ich ir gediene also· dc si minen dienst enphahe·
lieblich vnd in niht versmahe·
moͤhte es sin ich were vro·
frǒwe gůt du hast gewalt· minne dir vúr eigen·
wiltú trúwe an mir erzeigen·
selig wib min froide ist manigvalt·

In rehter schoͤne ein morgen sterne·
ist min frowe der ich gerne·
diene vnd iemer dienen wil·
swie klein si mir froͤide mere·
ich wúnsche dc ir selde vnd ere·
volge vnd da bi froͤiden vil·
ir guͤte vnd ir bescheidenheit·
ist leider gargen mir entslaffen·
mv̊s ich si darvmbe strafen·
dast min klage vnd al min herzeleit·

Wil dú liebe min gemvͤte·
troͤsten vnd ir wibes guͤte·
so mag ich vil wol genesen·
darzv̊ habe ich gůt gedingen·
lat dú liebe mir gelingen·
so mag ich in froͤiden wesen·
herzeliebe frowe min·
du solt wenden mine swere·
minneklichú seldenbere·
so mag ich in froͤiden sin·

Frowe min dur dine guͤte·
twing min herze vs vngemvͤte·
das ze froͤiden kere sich·
sit dc mir froͤide ist worden wilde·
so ere an mir wibes bilde·
nieman mag getroͤsten mich·
wan din helfe frowe gůt·
du magt mir wol froͤide machen·
dv kanst mich ǒch an froͤiden swachen·
swie dv wilt sam stet min mv̊t·