Manig belangen (Mit originalen Lettern)

Manig belangen·
iſt ergangin·
nach der zit·
dú nv git
vns ǒgenwunne vil·
dauō wund̾
wirt dar vnder·
lúte fro·
ich wer ſo·
wan das min frowe enwil·
wc frumt mich ſwie ſchoͤn es iſt·
ob ſi wūnē·
mir nicht gunnen·
wil vō ir·
ſo iſt mir·
als dem gar wunnen bꝛiſt·

Voglin ſingen·
ǒch gebꝛingen
mir nit mag·
das der ſlag·
v̾heile den mir ſlůg·
in min h̾ze·
ſender ſmerze·
vf den grunt·
da mir kunt·
wart dc mir mīne trůg·
an mine frowen minen můt·
wan dv́ reine·
wigt ſo kleine
min arebeit·
dauō leit
mir froͤide túre tůt·

Swenne ich ſchowe·
was min frowe·
wūnen hat·
ach wie gat·
dc dur dc herze min·
ſo zartliche·
minēkliche·
gebaret ſi·
ſecht da bi
hat ſi wūnenklichen ſchin·
ſi iſt zewunſche wol giſtalt·
ſo iſt ir gemuͤte
recht̾ guͤte·
ǒch ſo vol·
wol ir wol·
ir wunne iſt manigualt·

Froͤmdes minnen·
vn̄ angwinnen·
iſt gelich·
des ǒch ich·
vil wol beuunden han
wā min ſīne·
ſtent vf mīne·
da ich můs·
froͤmden grůs·
vúr allen troſt enpfā·
ſus gez dien die mīnent dar·
da vil hůte
wider ir můte
huͤten kan·
ſecht dar an·
v̾lierenz ir arbeit gar·

Dem gelinget·
licht der ringet·
vmb ein wib·
der ſin lib·
ſich mag geſellē zů·
wan ſin ſpꝛechen·
mag ir bꝛechen·
froͤmden ſin·
d̾ gewin·
ergêt im licht vil frů·
voꝛ heinliche wart nie nicht·
ſi kan wenden·
ſoꝛge vn̄ enden·
froͤiden kraft·
ſigehaft·
wirz gerne ſwa ſi geſchicht·