Leitliche blike vnd grôsliche rúwe

Leitliche blike vnd grôsliche rúwe·
hant^{[WS 1]} mir dc herze vnd den lip nach verlorn·
min alte not die klage ich fúr núwe·
wan dc ich fúrhte der schimpfere zorn·
singe aber ich dvr die dú mich froͤwet hie bevorn·
so velsche dvr got nieman mine trúwe·
wan ich dvr sanc bin ze der welte geborn·

Menger sprichet seht wie der singet·
wer ime iht leit er tete anders danne so·
der mac niht wissen was mich leides twinget·
nv tůn aber ich rehte als ich tet do·
do ich in leide stv̊nt· do hv̊b ich si gar vnho·
dis ist ein not dv́ sanges mich twinget·
sorge ist vnwert da die lúte sint fro·

Dú mines herzen ein wunne vnd ein krone ist·
vor allen frǒwen die ich noch han gesehen·
schoͤne vnd schoͤne vnd schoͤne aller schoͤnist·
ist si min frǒwe des mvͤs ich ir iehen·
al dv́ welt sol si dvrh ir schoͤne flehen·
noch were zit dc dv frǒwe mir lonist·
ich han mit lobe anders torheit veriehen·

Sten ich vor ir vnd schowe dc wunder·
dc got mit schoͤne an ir lip hat getan·
so ist des so vil dc ich sihe da besvnder·
dc ich vil gerne wolt iemer da stan·
o we so mv̊s ich vil trurig scheiden dan·
so kvmt ein wolken so truͤbes dar vnder·
dc ich des schinen von ir niht enhan·

Anmerkungen (Wikisource)

1. Vorlage: hat.