Leider winter vngestalt

Leider winter vngestalt·
vswert halt·
din gewalt·
sere smalt·
din kraft duldet bruch vnd spalt·
din múl niht mer^{[WS 1]} malt·
sang der vogelin vngezalt·
din engalt·
vnd der walt·
des dich schalt·
spruch der werlte manigvalt·
nv ist din runs verswalt·
wol vf reigen ivng vnd alt·
snewe sint versnalt·
werdú ivgent dv wesen salt·
froͤiden balt·
leit verschalt·
trostes walt·
sit verstossen vnd vervalt
sint die rifen kalt·

Jarlang sol er sin gemeit·
swem ein meit·
minne treit·
dú dc meit·
dc vs zúhten nie geschreit·
froͤid ist im^{[WS 2]} bereit·
seht so duld ich arebeit·
vnd leit·
sich entseit·
bi richheit·
milte gebennes^{[WS 3]} vnderscheit·
erge vor ir heit·
schande hat vf minen eit·
wite sich zespreit·
lútzel froͤid mich heide breit·
vnd ir kleit·
gruͤn vnd weit·
swie sis sneit·
sit die herren sint verzeit·
húr an miltekeit·

Schande stark als ein helfant·
vs gesant·
kvmt gerant
in dú lant·
si fuͤret fúrsten an ir hant·
die da sint geschant·
tugenden wert die sint erblant·
vnd erwant
vn erkant·
gar zertrant·
tv̊nt die edelen schiltes rant·
die da bosheit hant·
milte ich hinder kerge^{[WS 4]} want·
birgt als ein vasant·
eren veste sint verbrant·
ir gewant·
stet verpfant·
sit gemant·
ir die man bi tvgent ie vant·
mident schanden bant·

Anmerkungen (Wikisource)

1. Vorlage: mir.
2. Vorlage: in.
3. Vorlage: gebēdes.
4. Vorlage: kergē.