Lǒb gras blv̊mē vogel ſingē

Lǒb gras blv̊mē vogel ſingē·
klage ich vn̄ den gruͤnen kle·
die der winter wil twingen·
vn̄ dar zů der kalte ſne·
ſo clage ich ein ander ſwere·
dc mir dú vil ſeldebere·
ane ſchulde tůt ſo we·

Owe dc dú reine gůte·
mine ſw̾e nie bevant·
des iſt mir niht wol zemv̊te·
wie iſt min dieneſt ſo bewant·
dc ich ir niht minē kvmb̾
klagete ich gǒch ich tôꝛe ich tvmb̾·
vn̄ doch twingē mich ir bânt·

Herre got dv gib die ſinne·
d̾ vil liebē frowen min·
dc ſi erkenne ob ich ſi mīne·
h̾re vn̄ dur die guͤte din·
dv hilf mir dc ſi bevinde·
dc ich diente ir ie vō kinde·
dur ir mīneklichē ſchin·

Miner frowē mīne ſtrike·
hant gebvndē mir den lib·
vn̄ ir lihtē ǒgē blike·
ach genade ein ſelig wib·
dv hilf mir vō mīneſoꝛgē·
die min h̾ze hat v̾boꝛgē·
al die ſw̾e min vertrib·

Wil ſi minē kvmb̾ wendē·
d̾ ich ie dc beſte ſpꝛach·
troſt in ſendes h̾ze ſendē·
vō der ich lide vngemach·
ſi v̾derbet mich geſvndē·
ach wer heilet mine wūden·
die ſi dvr min h̾ze bꝛach·

Weſſe ich iemā ſo getrúwe·
dem ich klegete mine nôt·
minv́ leit dú ſint niht núwe·
beſſer were mir der tot·
ê dc ich alſvs v̾durbe·
vn̄ ich and̾s niht erwurbe·
ê kvſt ich ir mvnt ſo rot·

Reine guͤte tugent vn̄ ere·
hat ſi d̾ ich dienen wil·
in gewā nie frowē mêre·
ſi iſt miner ǒgē ſpil·
ſwie ſi mir dc h̾ze twīge·
d̾ ich iemer gerne ſinge·
ſo iſt ſi doch dú frowe min·