Jvnge vnd alte ir helfet alle froͤide meren

JVnge vnd alte ir helfet alle froͤide meren·
dc dú werlt noh werde vro·
nieman kan vúr truren bessers niht geleren·
dc weis ich vúr war also·
volget swer ú tvgende rat·
da mit ir so grôsse vnfroͤide mvget verkeren·
da dú werlt mit vmbe gat·

Wir sin besser fro so wir nah tvgenden ringen·
danne ein trurekliches leben·
vur die sorge svln wir tanzen vnd springen·
disen rat wil ich ú geben·
ich bin des gedingen fro·
das mir an der lieben sol noh wol gelingen·
dú mih hat betwungen so·

Nieman kan mit swerem mv̊te niht verenden·
ich bin vf genade fro·
selig wib ir svlt genade an mich wenden·
so stet mir dc herze ho·
ir sit wol dar zv̊ gestalt·
dc ir mvgt in trurig herze froͤide senden·
froͤiden habt ir vil gewalt·

Frowe mir hat úwer schoͤne vnd úwer gvͤte·
sv́ftens vil von herzen braht·
selig wib nv troͤste schiere min gemvͤte·
alle tage vnd alle naht·
so vergisse ich úwer niht·
dar zv̊ wúnsch ich dc dú selde ivh wol behvͤte·
swas so mir von ú geschiht·

Mich en wil der lieben gvͤte niht erlâssen·
ich betraht ir werdekeit·
sone kvm ich leider niender ir zemazen·
si ist hohe vnd mir zebreit·
doch mag ich dc niht verlan·
sin si iemer min geverte vf allen strassen·
dc ir niht vergessen kan·