Ich wil ab̾ ſingē
[92r]
Ich wil ab̾ ſingē·
doch moͤht ich vō ſvs getanē dingē·
bas ſv̊ftē vn̄ clagē·
owe groſſer leide
mich froͤit niht d̾ anger noch dú heide·
noch ſingē[WS 1] vn̄ ſagē·
mich froͤwet niht d̾ tamb̾ noch dú gige·
hoͤꝛe ich harpfē vn̄ rottē an dē mv̊t ich ſige·
vō d̾ reinē der ich dike nige·
mv̊s ich die ſw̾e tragē·
Jch hā leit vn̄ vngemach·
ſit ich ſi vō erſt geſach·
ach vn̄ aber ach·
Dv́ vil ſvͤſſe reine·
ahtet vf mich ſendē kleine·
dē tv̊t ſi wol gelich·
da begat ſi ſv́nde·
ſwie vil ich des mit geſange kúnde·
doch lebt ſi froͤmdeklich·
mir tv̊t we dc ſi mich ſendē ſmahet·
vn̄ dú liebe minē ſang niht in ir oꝛe enpfahet·
da von kvmber mir ī herzen gahet·
deſ bin ich ſoꝛgē rich·
Jch hā leit vn̄ vngemach·
ſit ich ſi vō erſt geſach·
ach vn̄ aber ach·[WS 2]
Grůs von rotē mvnde·
d̾ v̾gat mich leider zaller ſtunde·
des mv̊s ich froͤide lan·
lieblich ǒgēblike·
die v̾gant mih zwirēt alſo dike·
wie ſol min leit zergan·
mich froͤit niht dú ſv̄ne noh d̾ mane·
niemā kan mich troͤſtē wā dú reine valſches ane·
wil dú mīnekliche wolgetane·
ſo mag ich fro wol beſtan·
Ich han leit vn̄ vngemach·
ſit ich ſi vō erſt geſach·
ach vn̄ aber ach··[WS 3]
Ich habe ir geſvngē
vn̄ geſpꝛochē vil· mit lobend̾ zvngē·
dc beſte dc ich kan·
wil ſi des v̾geſſen·
ſo hat vngemvͤte mich beſeſſen·
trut mīne ſich dar an·
wig dc dv́ liebe ſte geliche·
ald dc ſi mir vs gedanke entwiche·
iamer tv̊t vil dike ſoꝛgē riche·
mih froͤideloſē man·
Jch han leit vn̄ vngemach·
ſit ich ſi vō erſt geſach·
ach vn̄ aber ach·[WS 4]
Swer mir gv̊tes gvnne·
vn̄ der minen kvmb̾ merken kvnne·
d̾ ſpꝛeche ir iemer wol·
der ſi lopt mit woꝛtē
der hat mine gvnſt an allen oꝛtē·
dc ich v̾diene ſol·
ich bin ir gebvndē gar fúr eigē·
dē ſi gv̊teſ gan der iſt geſcheidē vō dē veigē·
wolde ſi genade an mir erzeigē·
ſo wurde ich froͤiden vol·
Ich han leit vn̄ vngemach·
ſit ich ſi vō erſt geſach·
ach vn̄ aber ach·[WS 5]