Ich wene nieman lebe d̾ minen kvmb̾ weine

Ich wene nieman lebe d̾ minen kvmb̾ weine·
den ich eine trage·
es entů dú gůte die ich mit trúwen meine·
v̾nimt ſi mine klage·
we wie tv̊n ich ſo dc ich ſo h̾zekliche·
bin an ſi v̾daht dc ich ein kúnigriche·
fúr ir mīne niht ennemē wolde·
ob ich teilen vn̄ weln ſolde·

Swer mir des erban ob ich ſi mīne tǒgen·
ſeht der ſúndet ſich·
ſi won mir zallen ziten voꝛ dien ǒgen·
vn̄ dvnket mich·
wie ſi ge zv̊ mir dvr ganze mvrē·
ir troſt vn̄ ir helfe lâſſent mich niht trurē·
ſwēne ſi wil ſo fúret ſi mich hinnē·
mit ir wiſſen hant hohe vber die zinnen·

Ich wene ſi iſt ein venus here die ich da mīne·
wā ſi kan ſo vil·
ſi benimt mir beide froͤide vn̄ al die ſinne·
ſwenne ſo ſi wil·
ſo get ſi doꝛt her zv̊ einē venſt̾lin·
Vn̄ ſiht mich an reht als der ſvnnen ſchin·
ſwanne ich ſi danne g̾ne wolde ſchǒwen·
ach ſo get ſi doꝛt zv̊ and̾n frowen·

Do ſi mir alrerſt ein hohgemvͤte ſāde·
in dc h̾ze min·
des wc botte ir guͤte die ich wol erkande·
vn̄ ir lieht̾ ſchin·
ſach mich gvͤtlich an mit ir ſpilnden ǒgen·
lachen ſi began vs rotem mv̄de tougē·
ſa zehant enzvnte ſich min wūne·
dc min mv̊t ſtet hohe ſam dv́ ſvnne·

We wc rede ich ia iſt min gelǒbe boͤſe·
vn̄ iſt wider got·
wan bitte ich in des dc er mich hinan loͤſe·
es wc e min ſpot·
ich tv̊n ſam der ſwal d̾ ſinget ſwēne er ſtirbet·
wc ob mir min ſāc dc lihte noch erwirbet·
ſwa man minē kvmb̾ ſagt zemere·
dc man mir erbvnne miner ſwere·