Ich v̾klegte wol dú zit

ICh v̾klegte wol dú zit·
vn̄ die wūneb̾nden owe·
trôſte mich min trut min frowe·
nach der ſich min h̾ze dike ſent·
dv́ mir alſo liebe lit·
in dem h̾zen min behalden·
da ſi niemā kan v̾ſchalden·
ſi hat ſich ſo lieplich dar gewent·
mir wart nie lieb als rehte wert·
ſi iſt in mines h̾zen veſte·
wol dú hêrſte vn̄ ǒch dú beſte·
ſiſt der min wūſch vf erde gert·

Lachelich ein lôſer blic·
vs ir liehten ſpilndē ǒgen·
zarte mīneklichē tǒgen·
ſach ich lihtē in mins h̾zen grunt·
do kan mir vō vꝛoͤide ein ſtric·
vn̄ ein mīnegernd̾ ſmerze·
als lieblich ī daſ h̾ze·
dc es wart vō rehter liebe wūt·
do ich ſach ir mvnt dur lúhtig^{[WS 1]} rot·
alſe froͤideberes lāchē·
lieblich vn̄ froͤlich machē·
do gert ich nach liebe in wernde not·

Wer geſach ie wibes lib·
alſe ſchôn vn̄ alſe claren·
vn̄ ſo lieplich wol gebarē·
vn̄ ſo gar in wibes gvͤte gůt·
ſi iſt gar ein wiplich wib·
nach dē wunſche wol geſteliet·
ſelde hat ſich zir geſellet·
ſi hat kúſche zuht vn̄ reinen mv̊t·
io mein ich mins h̾zen vngemach·
nach der ich mit gerndem ſīne·
in der mīne h̾itze bꝛinne·
ſo wol mich das ichs ie geſach·

Anmerkungen (Wikisource)

1. Vorlage: lúhtlg.