Ich spúr ein wunder dur dú lant

Ich spúr ein wunder dur dú lant·
in gelher gruͤner varwe schin·
es hat fůs ǒgen noch die hant·
vnd wil doch bi den lúten sin·
beide armen vnd richen·
es bindet manigen âne bant·
es vert die tv̊nǒwe vnd den rin·
es treit den herren ir gewant·
vnd trinket mit^{[WS 1]} den vúrsten win·
es kan bi den frowen slichen·
es stirbet hie vnd wahset dort es vert spate vnd frǒ·
es sleich vf einen bǒn der ersten megede zv̊·
es slůg der werlte vierden teil·
vnd sleht noch ǒch·
vil manigen gǒch·
rint ane horn·
es hat vil manig man sin heil·
sinen lib sine sele von im verlorn·
sage an wem mag es sich gelichen·

Wie hoͤfsche lúte habe der rin·
dc ist mir wol mit schaden kvnt·
ir hvbe ir har ir keppelin·
erzeigent núwer fúnde vunt·
crist in helfe so si niesen·
es mag wol curteis pouel sin·
pittit mangier ist in gesvnt·
stad vf stad abe in wechset win·
in dienet ǒch des rines grvnt·
ich wil vf si gar verkiesen·
der ýmelvnge hort lit in den lvrlenberge in bi·
in weis ir niender einen der so milte si·
der den gernden teilte mite·
von siner gebe·
die wile ich lebe·
sin vri vor mir·
ir mv̊t der stat vf solhen sitte·
nv gib dv mir so gibe ich dir·
sînen wellent niht verliesen·

We dir von zweter Regimar·
dú núwest mangen alten vunt·
dú speltest als ein milwe ein har·
dir wirt vs einem orte ein pfvnt·
ob din liessen dich niht trúget·
dir wirt vs einem tage ein iar·
ein wilder wolf wirt dir ein hvnt·
ein gans ein gǒch ein trappe ein star·
dir spinnet hirz dur dinen mvnt·
wa mit hast dv dc erzúget·
ein lug dur dine lespe sam ein slehtú warheit vert·
dv hast dien vischen hv̊sten krebsen sat er wert·
bi dir so sint drú wunder tier·
dc ist der git·
has vnd nit·
dv doͤne dieb·
dv pruͤuest ane malz ein bier·
supf vs dir ist ein leker lieb·
der den herren vil gelúget·

Anmerkungen (Wikisource)

1. Vorlage: nit.