Ich lobe ein wib dú ist noch besser danne gůt

ICh lobe ein wib dú ist noch besser danne gůt·
sist schone vnd ist schoner vil vnd hohgemv̊t·
si hat vor allen valschen dingen sich behv̊t·
Ich gehorte nie wib so wol geloben als man si tůt·
Ýsalde wart so schoͤne nie·
noch trone dú ein gúttin wc·
Medea swc dú noch ie begie·
des half ir mit wisheit fro pallas·
Juno gab richeit dur die minne hoͤre ich iehen·
swc dv́do hatte dc wart geteilet vberal·
Latricia dú lie sich tǒgenlichen sehen·
Palatrica den frowen vil der kinde stal·
Helena wc eins kv́niges wib·
zů der kam ein discordia·
Dc gieng in ǒch beiden an den lib·
des engalt ǒch amarodia·
Es schv̊f ein wib dc troia wart
zerstoͤret· dú hies avenant·
Lunet dú wc von hoher art·
ir vatter der hies willebrant·
Venvs ein apfel wart gegeben·
da von so hůb sich michel not·
dar vmbe gab paris sin leben·
da lag ǒch menalavs tot·
Sibille wc ein vil listig wib·
bi der amabilia·
Si rieten vf senatoren lip·
dc tet dú leide innuidia·
Fro planzhiflúr dv́ was allen dingen klůk·
dar vmbe walheis sit vil lange wart vertriben·
Cawan der den anker werdekliche trůc·
der klegte dc ýwin in dem fores wc beliben·
Sarmena klegte grôs vngemach·
dc Camv́ret als mvͤssig sas·
ze Cvraze si do mit zorne sprach·
da lanzlet sich des vermas·
dc er mich reche an parcifale·
der hectore sin veste brach·
Er nam zekaridol den gral·
da des achilles niht enrach·
so richet es mir galogriant·
Swas opris mir zeleide tůt·
týspe was elýon bekant·
gegen piramus stůnt ir mv̊t·
Dú clare amýe sprach zir massenie so·
Min gvmpenie· sol der stoͤrie wesen vro·
Ginofer vs britanie lant·
die artus hat ze wibe erkorn·
die man in hoher zhoie ie vant·
der brahte vs prouenzal ein horn·
von portigal ein pezhelier· dc wc so wunderlicher art·
swer dar vs trank der wandel hete dc er da mit begossen wart·
Porhtram dú was von lunders so geborn her·
das schůf der wigol gegen den prouenzal ein sper·
her wigamv́r da vor Camvoleis
wol tet ers als wirs han vernomen·
gegen dem so hielt her wigoleis·
der was den vrowen zedienste komen·
Tristran erwark die kúnigin
von Marroch als wir hoͤren sagen·
Ein moͤrin wc dú heidenin·
der alden svln wir hie gedagen·
vnd loben min gv̊ten·
Die reinen wol gemv̊ten·
Swa si gat an dem tanze·
swa si gat an den tannze·
mit ir rôsen kranze·
dar obe ein ander krenzel·
ein wis gevalden swenzel·
Ir har gelich dem golde·
Als es got wúnschen solde·
Chrus alsam die siden·
wan mehte si wol liden·
Swa minne wer genême·
dú liebe da wol zeme·
von orient
vnz ze occident·
wart nie schoner wib geborn·
Ich han die gv̊ten·
wol gemv̊ten·
iemer mere zetroste erkorn·
Ir mv̄t gewelwet·
niht geselwet·
ist ir wengel vnd kel·
ob ich iehe·
das ich sehe·
da ir lib ist sinewel·
des ensol ich melden· seht dc zeme niht·
wan der si mit minen ǒgen ane siht
dem mv̊s si wol gevallen·
zewunsche vor in allen·
Ich lobe ir zuht ir gvͤte·
ir stete ir hohgemvͤte·
ir lib der ist so wol gestalt·
swer bi ir solde werden alt·
der hat der werlte lob vil gar·
si ist so minneklich gevar·
an ir ist niht vergessen·
zewunsche ist si gemessen·
vf ir húfel vberal·
da sol ein borte ligen smal·
vil wol gesenket hin zetal·
da man ir reiet an den sal·
da ist lib gedrollen·
zewunsche wol die vollen·
volge mir
sam tv̊n ich dir·
herzeliebú reine· du gv̊te dú svͤsse·
tv̊st dv́ dc·
so wirt mir bas·
dc dich got vristen mvͤsse·
Minne mich
sam tv̊n ich dich·
sol ich iemer helfe alde froͤide gewinnen·
frôwe min
dc mvͤste sin·
vil gar von dinen minnen·
wol gemv̊ten·
lânt die gv̊ten·
iv behagen·
Si sol von rehter arte der eren krone tragen·
Swa si gat zv̊ der linden·
mit wol gemv̊ten kinden·
da zimt ir wol dc reigen·
si zieret wol den meigen·
Ir zimt wol dc lachen·
dc kan si sv̊sse machen·
si machet trurig herze fro balt·
si ivnget den der ê· wc alt·
Lopt ieman sine frowen bas·
dc lasse ich iemer svnder has·
Nv heia tanhvsere·
zergangen ist din swere·
Swa dú liebe bi dir were·
dú ist so froͤidebere·
Da wurde wol gesvngen·
getanzet vnd gesprvngen·
Nv dar·
nement war·
wa dú liebe springet·
vor mir·
nach mir·
swie der seite erklinget·
gestriket wol zeprise·
ze bliken also lise·
wa ist min fro mazze·
der springe ich zetrazze·
Nv seht an ir fuͤsse·
die machent es so svͤsse·
seht an ir beinel
reit brvn ist ir meinel·
wa ist min fro ivzze· dú liebe also lange·
dc elle an dem tanze·
niht springet gedrange·
Nv wol vf zerlinden· ir kint also ivngen·
da wirt vnder kranze
zetanze gesvngen·
heia svmer wunne·
swer vns din erbvnne·
hie nimt der tanz ein ende·
swer vns die froͤide wende·
den vermiden rosen·
vnd alle zitelosen·
vnd aller vogellinen sang·
mich twinget dc mich e da twang·
Nv singe ich aber hei·
heia nv heý·
Nv ist dem videllere sin videlboge enzwei·