Ich han erwelt mir ſelben ſvͤſſen kvmber

Ich han erwelt mir ſelben ſvͤſſen kvmber·
den wil ich han fúr aller blv̊men ſchin·
erſt niht wiſe der mich hat deſte tvmber·
nît was ie der mv̊s ǒch iemer ſin·
dvrh die liebe trage ich diſen pin·
den han ich erwelt nv ſi ouch min·
tv̊ mir ſwie du welleſt frowe der gewalt ſi din·

Jch mane die ſvͤſſen reine noch ir trúwē·
die ſi mir gap deſt vnmaſſen lang·
kem ich wider ich ſchiede vſ allen rúwen·
geſchiht des niht ſo wirt min leben kranc·
nach der ie min herze ſere rank·
mir geſchiht von ir minne ſvnder wank·
als der nahtegal div ſitzet tot ob ir froͤiden ſang·

Solte ich ſterben von ir groſſen leiden·
das wer mir ein angeſlichv́ not·
wes ſchuld das ſi das wil ich iv beſcheiden·
daſ iſt ir minneclicher mvnt ſo rot·
froͤmde ich ſi lange das iſt min tot·
ǒch wurden ir vil liehte ǒgen rot·
do ich vrlub nam vn̄ mich in ir genade bot·