Ich erwinde nimer (Mit aufgelösten Abbreviaturen)

ICh erwinde nimer
si werde mir·
eine heisset diemel
vil wol getruwe ich ir·
es mag ir niht versmahen·
dc ich si ie gebat·
si sol sich niht vergahen·
min velt gat an ir trat·
ekeman der rǒfet ekemanmen·
da von so hab ir roten mvnt zesammen·

ICh het an si gewendet·
gar allen minen mv̊t·
ich wande ich hetz vol endet·
si sprach wa ist dc gv̊t·
ich kan ú niht gezeigen·
des minen gv̊tes mer·
wan rúwental min^{[WS 1]} eigen·
dc braht min mv̊ter her·
frowe dc wil ich iv gippen gappen·
herre dc sult ir iv hippen happen·

Der ich mich mit willen
ie ze dienste bot·
an der han ich ersehen
einen gúrtel rot·
swas ich ir gewinke·
das ist ir an mich zorn·
glesin ist dv́ ringge·
von kvpfer ist der dorn·
ich nam sin war es was ein smaler riemen·
den braht ein ritter her von wiemen·

Ich kom ir nach geslichen·
in ein fúr holz·
ir froͤide dv́ was michel
bi einem ritter stolz·
ich kom dar nach gegangen·
des wart ich vnfro·
dv́ wile wert vnlangen·
nider druht er si do·
er gab ir schiere in ir wîssen hentel·
eines heisset man den gimpel gempel·

Do si den gimpel gempel·
in die hant genam·
si sast in an das wempel·
er druht in durh die gram·
nv ruͤra dv den hozel bozel vaste·
dc der gimpel gempel iht geraste·
vrra burra wer gat da·

Anmerkungen (Wikisource)

1. Vorlage: iſt min.