Ich diene ir sit das wir beidú waren kint

ICh diene ir sit das wir beidú waren kint·
dú iar mir sint·
gar swer gesin·
wan si wag so ringe minen dienest ie·
sin wolte nie·
gerůchen min·
das wart irbarmende herren dien warts kunt·
dc ich nie mit rede ir was giwesen bi·
des brachten si·
mich dar zestunt·

Swie ich was mit hohen herren komen dar·
doch was si gar hert wider mich·
si kert sich von mir do si mich sach zehant·
von leide geswant·
mir hin viel ich·
die herren hůben mich dar da si sas·
vnd gaben mir balde ir hant in min hant·
do ich des benant·
do wart mir bas·

Mich duchte das nieman moͤchte han erbetten si·
das si mich fri·
not hete getan·
wan das si vorchte dc si schuldig wurde an mir·
ich lag vor ir·
als ein tot man·
vnd sach si iemerlich an vs der not·
des irbarmet ich si wan ichs hate von ir·
des si doch mir
ir hant do bot·

Do sach si mich lieblich an vnd rete mit mir·
ach wie zam ir·
das so gar wol·
ich mochte si so recht geschowen wol getan·
wa wart ieman·
so froͤiden vol·
die wile lagen min arme vf ir schôs·
ach wie sůsse mir das dur min herze gie·
min froͤide nie·
mer wart so gros·

Do hate ich ir hant so lieblich vaste gotte weis·
dauon si beis·
mich in min hant·
si wande das es mir we tet do froͤte es mich·
so gar sůsse ich·
ir mundes beuant·
ir bissen was so zartlich wiblich fin·
des mir we tet das so schiere zergangen was·
mir wart nie bas·
das můs war sin·

Si baten si vaste eteswas geben mir·
des si anir·
lange hete gehan·
also warf si mir ir nadilbein dort her·
in suͤsser ger·
balde ich es nam
si namen mirs· vnd gabens ir wider do·
vnd irbaten si das si mirs lieblich bot·
in sender not·
wart ich so fro·

Der vúrste von konstenz· von zúrich dú vúrstin·
vil selig sin·
der vúrste ǒch sa·
von einsidellen von Toggenberg· lobelich·
graf friderich·
vnd swer was da
vnd half alt riet· das man mich brachte fúr si·
das taten hohe lút der frume Reginsberger·
nach miner ger·
ǒch was da bi·

Vnd der abt von petershusen tuginde vol·
half mir ǒch wol·
da waren ǒch bi·
edil frowen· hohe pfaffen· ritter gůt·
da wart min můt·
vil sorgen fri·
ich hate ir gunst die doch nit hulfen mir·
her Rudolf von Landenberg gůt ritter gar·
half mir ǒch dar·
vnd liebte mich ir·

Dem die besten helfent das veruat ǒch icht
dú zůuersicht·
wart mir wol schin·
wan der vúrste von kostenze loblich gerecht·
vnd her albrecht·
der brůder sin·
vnd her Ruͤdge Manesse die werden man·
hulfen mir vúr min edlen frowen klar·
des manger iar·
nie mochte irgan^{[WS 1]}·

Es ist lang das mich von erst ir wunne vie·
vnd das ich nie·
so nach ir kan·
wan si stalte vngrůslich sich ie gegen mir·
des ich zů zir·
nie getorste gegan·
ich dachte sit si nicht růchet gruͤssen mich·
giege ich fúr si das were lichte so verre ir has·
nicht wan vmb das
verzagt dan ich·

Moͤchte ein herze von froͤiden dur den lib vsgan·
in moͤchte behan·
des minen niet·
sit ich vúr die wolgetanen komen bin·
von der min sin·
mich nie geschiet·
ich hate ir hant in minen henden ach·
est ein wunder das von rechten minnen nicht·
in der geschicht·
min herze brach·

Ach ich horte ir suͤssen stimme ir zarten wort·
si reiner hort·
des hat si pris·
so sach ich ir munt ir wengel rosen uar·
ir ǒgen clar·
ir keln wis·
ir wiblich zucht ir hende wis· als der sne·
mir was lieblich wol vnz ich můs dannan gan·
mir sendem man·
tet das so we·

Wol vns das der klingenberger vúrste ie wart·
die rechten vart·
die vv̊ren si·
dien zeherren walten er kan wise vnde wort·
der sinne hort·
der wont im bi·
sin helfe sin rat· sin kunst sint endelich·
des die wisen habten sin zeherren ger·
des heisset er
bischof Heinrich·

Anmerkungen (Wikisource)

1. Vorlage: irgar.