Ich ſachſ an der min froͤide lit

Ich ſachſ an der min froͤide lit·
bi andern ſchonen frǒwen gan·
ſi duhte mich an allen ſtrit·
dú beſte vn̄ da bi wolgetan·
da was vō frǒwen ein michel ſchar·
ich nam niht wan einer war·
min ǒgen blihten dike dar·

Minne ſvͤſſiv fuͤgerinne·
dv fuͤge das min w̾de rât·
dv twīge ir h̾ze vn̄ alle ir ſinne·
rehte als ſi mich betwungē hat·
tv̊ mir vf der ſelden túr·
flús zv̊ vn̄ la mich niht da fúr·
ſo ſeze ich vf der ſelden kivr·

Mich hat ein lieht̾ ǒgen blik·
geſchoſſē in das herze min·
da leite ſi mir der mīne ſtrik·
des mv̊s ich ir gevangē ſin·
wer heilet hie ia bin ich wunt·
dc tv̊t ir roſevarwer mvnt·
ſolde ich dē kv́ſſen tvſentſtūt·

Genigē ſi der gv̊ten dar·
der ich vil eigēliche bin·
ſwar ich in dien landē var·
ſo hat ſi doꝛt herze vn̄ ſin·
vō mir geſcheiden ane ſtrit·
min troſt min heil gar an ir lit·
ir lib froͤit fúr des meien zit·

Kvnde ich nv mit fůge erwerbē·
dc ich ir gelege bi·
geſchiht des niht ich mv̊s v̾derben·
ſeht wie gerne ich bi ir ſi·
dvr ſi ſo lide ich groſſe not·
in v̾meit noch nie ſwas ſi gebot·
ſi troͤſte mich alder ich bin tot·