IN klage niht blv̊men noh den kle

IN klage niht blv̊men noh den kle·
si koment ze meien aber als ê·
mir tv̊t ein ander swere we·
ich wil al der werlte klagen·
mich hies ein frowe ein currit tragen·
an blôsser hvt wil ich úch sagen·
ein iar vnd ǒch an essen sin·
den einen tag min froͤwelin·
verbot mir wasser vnd win·

Nv han ich geleistet ir gebot·
nv bin ich leider aber ir spot·
lant úchs erbarmen herre got·
dc min dú schone niht enwil·
vnd si mich efftet alse vil·
dc ist mir noh ein kindes spil·
der nifer lobt die frowen sin·
vnd ir roͤselehtes múndelin·
so singet alle ir tvgende schrin·

Da hant si gůte kleider an·
so sint si deste bc getan·
so mv̊s min lieb in vezzen gan·
der mirs nv schiede vf lieben wan·
so hancte ich ir einen schúrliz an·
wolt si sam mir in den schochen gan·
ir stat ir roter mvnt so wol·
sit mich nv der verderben sol·
wan wer er swerzer danne ein kol·