Heý winter din gewalt (Mit aufgelösten Abbreviaturen)

Heý winter din gewalt·
tv̊t vns aber húre leit·
dv verderbest vns der blv̊men schin·
du velwest gruͤnen walt·
vnd dar zů die linden breit·
dv gesweigest vns dú vogellin·
des bin ich vn vro doch so mac sin werden rat·
wil dú suͤsse reine·
die ich mit trúwen meine·
min mv̊t hohe stat·

Heý wenne sol es sin·
das ir múndel rosen rot·
welle wenden minen kvmber lang·
zwei liehten wengelin·
weren gv̊t fúr sende not·
vnd ein minneclicher vmbevanc·
wafen herre io wenne sol ir roter mvnt·
mir ein kússen lihen·
swere mich enzihen·
wolte ich sa zestvnt·

Swanne ich ir minne gêr·
so vraget si wc minne si·
nv kan ich irs bescheiden niht·
si volge miner lêr·
si mir eteswenne bi·
eine wile da es nieman siht·
lihte kvmet es so ê·
das wir vns scheiden dan·
das ich sis gelere·
das sis iemer mere·
ze wnsche wol kan·

Lihte hat si sorge des·
ob si minne mich gewêre·
der ich lange han an si gegert·
dc si der iht genes·
nein ir stirbet verre mer·
die niht minnent vnd sint minnen wert·
mêre danne zwo sint bi minen ziten tot·
die niht minnen wolden·
do si minnen solden·
vnd minne ins gebot·

Mir were wol gelich·
beide blůmen vnd sne·
wolde si genade an mir began·
so wurde ich froͤide rich·
nvn beschiht es niht owe·
so verdirbet mir min lieber wan·
der mir volleclich an die minneclichen riet·
do ich si min vrowen·
erst begonde schowen·
von sorgen ich schiet·