Ganzer froͤidē wart mir nie ſo wol zemv̊te

Ganzer froͤidē wart mir nie ſo wol zemv̊te·
mirſt gebotē dc ich ſingen mv̊s·
ſelig ſi dú mir dc wol v̾ſte zegůte·
mich mant ſingē ir vil w̾der grůs·
dú mī iemer hat gewalt·
dú mag mir wol trurē wēdē·
vn̄ ſendē
froͤide manigvalt·

Git das got dc mir noch wol an ir gelīget·
ſeht ſo w̾e ich iemer mere fro·
dú mir beide herze vn̄ lip zefroͤidē twinget·
mich betwang nie me kein wib alſo·
es was mir gar vmbekant·
das dú mīne twīgen ſolde·
ſwie ſi wolde·
vnz ichs an ir bevant·

Svͤſſe mīne ſit nach diner ſvͤſſen lere·
mich ein wib alſo betwūgen hat·
bit ſi dc ſi ir wiblich gvͤte gegē mir kere·
ſo mag miner ſoꝛgen w̾den rat·
dur ir liehten ǒgen ſchin·
wart ich alſo wol enpfangen·
gar zergangē·
was dc trurē min·

Mich froͤit iem̾ dc ich alſo gv̊tē wibe·
dienen ſol vf mīneklichē danc·
mit dem troſte ich dike trurē mir v̾tribe·
vn̄ wirt min vngemvͤte kranc·
endet ſich min vngemach·
ſo weis ich vō warheit dāne·
daſ nie māne·
an liebe bc beſchach·

Minne wūd̾ kan din guͤte machē·
liebe vn̄ din twingē ſwendē froͤidē vil·
du lereſt liebe vs ſpilndē ǒgē lachē·
ſwa dú merē wilt din wūder ſpil·
dv kanſt froͤiderichē mv̊t·
ſo v̾woꝛrenliche v̾kerē·
dc din ſerē·
ſanfte vnſanfte tv̊t·