Froͤit úch gegē der zit

Froͤit úch gegē der zit·
die d̾ ſvm̾ bꝛinget·
ſchowent wie der anger lit·
wol geblůmet vn̄ dú heide bꝛeit·
froͤiderichē ſang·
manig vogel ſinget·
meie hab es iemer dank·
dc er walt vn̄ ǒwe hat bekleit·
des iſt manig h̾ze fro·
ich lebt ǒch alſo·
troſte mich ein ſelig wib·
nach d̾ ſenet ſich min ſender lip·

Solt ich trurig ſtan·
ob ich ſi mv̊ſ midē·
we wie we dc getân·
vf genade ſtet min mv̊t vil ho·
wan ſol vngemach·
mit gedulde lidē·
wol mich dc ichs ie geſach·
machet ſi mich mit ir willē fro·
dc froͤit vf vons h̾zen grunt·
roͤſelehter mvnt·
tů mih noh vō ſoꝛge erlôſt·
an ir willē lit minſ h̾zen troſt·

Trage ich hohē mv̊t·
dc kvmt vō ir guͤte·
ir mvnt ſtet in ſvͤſſer blůt·
ſam in tǒwe ein liehtú roſe rot·
ir vil truter lip·
der git hohgemvͤte·
ich geſach nie lieb̾ wib·
noh ſo gůt fúr ſeneliche not·
ſwen ir gvͤte troͤſtē wil·
der hat liebes vil·
da vō wúnſch ich alle ſtunt·
dc mich kúſſe ir wol geroͤter mvnt·

Frowe ich weis vil wol·
was ich an dir minne·
dv biſt aller ſeldē vol·
dv biſt ſchoͤne vn̄ mīneklich geſtalt·
dv biſt valſches vri·
dv biſt ſteter ſinne·
dir wont wibes guͤte bi·
dv biſt ſenfter ſpꝛúche vn̄ niht zebalt·
dv biſt kv́ſche zúhtig gar·
dv biſt wandels bar·
dv haſt alles liebeſ teil·
ſelig wib got gebe dir iem̾ heil·

Lieb dv liebeſt mir·
lieb in rehter liebe·
lieb nv la mich liebē dir·
ſit dc lieb mit liebe lieber wirt·
lieb mich liebe alſo·
das mich leit v̾ſtiebe·
lieb ſo wird ich liebeſ fro·
wan lieb lieb in h̾zen liebe birt·
lieb ſit dc ich liebeſ ger·
lieb mich liebes wer·
lieb dv biſt min liebeſ lieb·
lieb die liebe zvket mir kein dieb·