Es wirfet der ivngen vil (Mit originalen Lettern)

Es wirfet der ivngen vil·
vf der ſtraſſen einen bal·
daſt deſ ſvmers erſteſ ſpil·
der ſelbe gogelliche ſchal·
meldet einen ziteling·
dc iſt ein ſpil vn̄ ein ding·
des ich iemer gerne embir·
wc ob mir·
des doꝛfes neue gêbe einen ſtôs·
des vnfůge iſt alſe grôs·
wan er wipfet her vn̄ dar·
in der ſchar·
er kan fliehē vn̄ iagen· mit dem wurfe triegen·
ſvs machēt vmbe dē giegen·
ie zwei vn̄ zwei·
ein hopelrei·
reht ſam ſi wellen fliegen·

Boppe ioͤchet envnt her·
alſam er habe ein wilt erſehen·
ſo kvmt einer heiſſet ber·
ſchachende vn̄ wil ǒch ſpehē·
ob im der bal w̾den mv́ge·
vnzitiger krākes flúge·
mag man wunder ſchowen da·
iara ia·
wie die megde ſchúllē loben·
wie ſi glijen wie ſi toben·
ſwēne er den bal werfen ſol·
ſoſt in wol·
wan er welt wem er den bal dvr die lúfte ſende·
ſi bietent im ir hende·
dv biſt doch min·
geveterlin·
wirf mir her an diſ ende·

Vnſerm neuen túnzel tůt·
nit ſo wol ſo dc dú kint·
iv́telin vn̄ elſemv̊t·
voꝛ im vf dem anger ſint·
ſwelhú den bal kan beiagē·
dú ſol lob ze voꝛderſt tragē·
der vō rvmpolzkrvmpoltz lief·
vn̄ rief·
wirf mir her ich wirfe dir wider·
er ſties manige dirne nider·
als in ſin vnfůge hies·
dar nach ſties·
erkenbolt ein dirnelin· dc lief nach dem balle·
er ſties es imme ſchalle·
vber eppen bein·
dc im erſchein·
ein kniekel vō dem valle·