Er iſt gewaltig vn̄ ſtark

Er iſt gewaltig vn̄ ſtark·
d̾ zewihēnaht geboꝛn wart·
dc iſt d̾ heilige kriſt·
ia lobt ī alles dc dir iſt·
niwā d̾ tieuel eine·
dur ſinē groſſē vb̾mv̊t
ſo wart im dú helle zeteile·

IN der helle iſt michel vnrat·
ſw̾ da heimvͤte hat·
dú ſvnne ſchinet nie ſo lieht·
d̾ mane hilfet in nieht·
noh d̾ liehte ſt̾ne·
ia mvͤt in alleſ dc er ſiht·
ia werer da zehimel alſo g̾ne·

IN himelrich ein hvs ſtat·
ein gvldī weg dar ī gat·
die ſv́le die ſint marmelin·
die zieret vnſer trehtī·
mit edelē geſteine·
da kvmpt niemā in·
ern ſi voꝛ allē ſv́ndē alſo reine·

Sw̾ g̾ne zv̊ d̾ kirchē gat·
vn̄ ane nît da ſtat·
d̾ mag wol froͤlichē lebē·
dē wirt zeivngeſt gegebē·
d̾ engel gemeine·
wol im dc er ie geboꝛn wart
zehimel iſt dc lebē alſo reine·

Ich han gedienet lange·
leid̾ einē māne·
d̾ in d̾ helle vmbe gat·
d̾ bꝛvͤuet mine miſſetat·
ſin lone der iſt boͤſe·
hilf mir heilig̾ geiſt·
dc ich mich vō ſiner vancniſſe erloͤſe·

Mich hung̾te harte·
ich ſteig ī einen garten·
da wc obez īnen·
deſ moht ich niht gewīnen·
dc kom vō vnheile·
dike wegt ich dē aſt·
mir wart deſ obeſes nie niht zeteile·

Swa ein gůt bǒm ſtat·
vn̄ zweier hāde obes hat·
beide ſvͤz vn̄ ſvr·
ſo ſpꝛichet eī ſin nah gebvr·
wir ſvln dc obez teilē·
wirt ir eines dꝛvnd̾ vul·
es bꝛinget vns dc and̾ zeleide·

Swel mā ein gv̊t wib hat·
vn zein̾ ander gat·
d̾ bezeichent dc ſwī·
wie moͤht es iem̾ erger ſin·
es lat dē lut̾n bꝛv̄nen·
vn̄ leit ſich ī dē truͤben pfůl·
dē ſitte hat vil manig mā gewūnē·

Ein mā ſol habē ere·
vn̄ ſol ie doh der ſele·
vnd̾ wilen weſen gv̊t·
dc in dehein ſin vb̾mv̊t·
v̾leite niht zeverre·
ſwēne er vrlobes ger·
dc es im an dē wege niht enwerre·

Koꝛn ſêt ein bvman·
do enwolde es niht vf gan·
im erzoꝛnte dc·
ein ander iar er ſich v̾mas·
dc ers en egerde lieze·
er ſolde es im gvͤtlich gebē
d̾ dē andern vmb ſinē dienſt iht gehieze·

Criſt ſich zemart̾enne gab·
er lie ſich legē ī ein grab·
dc tet er dvr die gotheit·
da mit lôſte er die kriſtenheit·
vō d̾ heizen helle·
er getůt es niem̾mer
dar an gedenke ſw̾ ſo der welle·

An dē oſterlichē tage·
do ſtůnt ſich criſt vō dē grabe·
kúnig aller keiſer·
vat̾ aller weiſen·
ſine hantgetat er loſte
ī die helle ſchein ein lieht
do kom er ſinē kindē zetroſte·

Wurze des waldes·
vn̄ erze deſ goldeſ·
vn̄ ellú abgrúnde·
dú ſint dir h̾re kv́nde·
dú ſtent in diner hende·
alleſ himelſchliches her·
dc en moͤhte dich niht vol loben an ein ende·